BAU: Kaunsil Pelilih Bau dipinta nyendia Atur Pengawa Standard (SOP) pengelikun khas ungkup pedagang rumah temuai (homestay) enggau palan rekreasyen ai ba ditu nipak pemesai guna nyamin pengelikun bala pengusung.

Sapit Menteri Pengangkut Sarawak (Sungai enggau Tasik) ti mega Kaban Kunsil Nengeri (ADUN) Tasik Biru Datuk Henry Harry Jinep madah, pengawa netapka SOP ukai semina nyaup nambah standard endur diau komuniti tang mega meri pengandal ngagai bala pengusung ti deka ngasai peneleba dia.

“Aku engka minta Kaunsil Pelilih ngambi kitai bisi SOP ungkup pengempu rumah temuai ari sukut pengelikun bala pengusung, ngena bot enggau ke bukai ngambi semua SOP bisi standard nyaga enggau pejalai pengawa manah.

“Kitai meseti ransing agi ngambi sida ngeleda ke pemesai guna nyaga pemeresi enggau pengelikun… chukup kuasa karan, bisi kereban pengerara api, endur enda petang maya malam hari.

“Tu entara pekara ti patut diperunding Kaunsil Pelilih Bau,” ku iya lebuh pengawa nutup Program Meri Pengeleda Pengelikun enggau Pemeresi Sungai Adis Tiporang, Kampung Segong, ditu kena Hari Enam.

Iya mega minta pengempu rumah temuai diberi penerang belebuh bekaul pemesai guna pengelikun enggau atur teda nentuka rumah temuai nya beresi, likun sereta ngasi ke atur raban bekuasa lokal. - EDISI UKAS