KUCHING: Sepenyampau 30 Tuai Raban Bansa enggau Tuai Komuniti (KMKK) ari sitak Pemansang Poyut Lubuk Nibung, Marudi ngulu penemuai sambil belajar ngagai Parlimen Malaysia enggau Kunsil Nengeri (DUN) Sarawak empai lama.

Tuju penemuai tu dikena nambah penemu pasal sistem sereta atur ngaga polisi ba renggat nengeri enggau perintah besai.

Raban nya betuai ke Pegawai Pelilih Marudi, Rose Edward Tarang begulai enggau Penulung Pegawai Pengatur Pengawa Opis Pelilih Marudi ti mega pegawai pengiring, Fazzwan Yunus.

Di Parlimen Malaysia, bala penyereta diberi penerang bekaul pangku pengawa Dewan Rakyat enggau Dewan Negara, atur ngaga undang-undang sereta pangku pengawa institusyen nya netapka polisi di baruh langgur Konstitusyen Perintah Besai.

Nangkan nya ba DUN Sarawak, raban nya dibai berati ke atur ngemendar bajet nengeri, ngaga undang-undang nengeri sereta mekanisme meresa enggau berati ke polisi perintah nengeri.

Kelimpah ngatur penemuai rasmi nya, penyereta mega dibai nemuai ngagai sekeda endur ngelingi Kuching dikena nambah penemu pasal tusun atur enggau pemansang nengeri.

Program diatur Opis Pelilih Marudi tu dikena negap pangku pengawa KMKK nyadi tuai renggat baruh kelebih agi bekunsi polisi perintah enggau nyukung inisiatif pemansang komuniti ba sitak sida.

Nengah peneleba tu, KMKK dikearap ulih nambahka penemu sida seraya nyaup nentuka polisi perintah dikenatai ngagai rayat nemban agi. -EDISI UKAS