Sarawak Mujur Matak Pengawa Meranak Puku RM105.9 Bilion Ba 2021-2025
KUCHING: Sarawak mujur matak meranak puku sepenyampau RM105.9 bilion ungkup timpuh 2021 nyentuk ngagai suku ketiga 2025 taja napi penanggul global.
Sapit Menteri Dagang Antarabansa, Industri Enggau Meranak Puku Sarawak Datuk Dr Malcolm Mussen Lamoh madah, penyampau tu nyengkaum RM68.4 bilion (64.5 peratus) meranak puku domestik enggau RM37.5 bilion (35.5 peratus) meranak puku luar.
"Pengawa beranakka puku ti dikemendar datai ari tiga sektor besai iya nya RM47.3 bilion ari sektor primer, RM31.3 bilion ari sektor kilang enggau RM27.3 bilion ari sektor servis.
"Tu udah nempa lebih 25,000 pengawa puang, nyengkaum lebih 21,000 pengawa ba sektor kilang," ku iya maya nyimpul jaku ari Opis Menteri Dagang Antarabansa, Industri Enggau Meranak Puku Sarawak ba Aum Ketiga Penggal Keempat Kunsil Nengeri (DUN) Sarawak Ke-19, Hari Satu.
Sepemanjai timpuh tu ku iya, pengawa meranakka puku ba sektor kilang ngemerat industri Elektrikal enggau Elektronik (E&E) sereta industri kimia.
Berebak enggau nya, Kaban Kunsil Nengeri (ADUN) Batang Ai nya madah, Asil Kasar Dalam Nengeri (KDNK) Sarawak mandangka pemansang ti konsisten ari RM131.6 bilion ba taun 2021 ngagai RM148.2 bilion ba taun 2024.
Nitih ku iya, sektor kilang nyadi sektor kedua pemadu besai, ngerikod pemansang ti semampai berubah nempa tikas pemadu tinggi ba taun 2022 enggau penyampau manggai RM39.2 bilion, lalu ba taun 2024 ngerikod sepenyampau RM38.2 bilion. -EDISI UKAS
