KUCHING: Perintah Sarawak Udah ngemendar pengawa ngaga 84 projek Skim Pengentap Baru Pendiau (SPS) enggau Skim Nangkir Genturung Pendiau (SPK) nengah Pelin Pemansang Malaysia Lumpar Ke-12 (RMKe-12).

Sapit Menteri Perambu Mengeri, Pengatur Tanah enggau Rampa Menua, Datuk Len Talif Salleh madah, projek tu deka nyendiaka 8,564 lot rumah enggau ungkus ngaga dipelaba manggai RM1.581 bilion.

“Ari 84 projek nya, 28 projek udah tembu lalu 54 projek agi deka ditandu nyentuk pengujung RMK-12 enggau RMK-13,” ku iya nerang maya nyimpul jaku ari Opis Menteri Pengeraja Asal enggau Pemansang Mengeri ba Aum Ketiga Penggal Keempat Kunsil Nengeri (DUN) Sarawak Ke-19, Hari Satu.

Kelimpah ari nya, ku iya, Perintah Sarawak mega ngemanah polisi nengah numbuh pemansang infrastruktur spesifikasyen baru digaga ti ngaul jalai alun, parit semin, lot disapat enggau sistem retikulasi bekal ai sereta bekal karan di SPS enggau SPK ngaul purata ungkus sepenyampau RM150,000 ungkup tiap buah lot.

“Enggau penyiru Perintah Sarawak, bayar premium tanah ungkup tiap lot ditetap enda ngelui RM2,500 lalu chara mayar iya ulih digaga enggau chara pupuk ninting taun nyentuk 10 taun,” ku iya nerang baru.

Berebak enggau nya, ku iya, Opis Pemansang enggau Ngintu Tanah (LCDA) mega ngaga projek rumah ulih dibeli nengah SPK, Pusat Pertumbuhan Desa (RGC) enggau Bandar Baru Sebuyau.

"Naka ke diatu, bisi 1,253 buah rumah ulih dibeli udah dikemendar digaga ke diatu ba macham renggat perambu sereta ngaga,” ku iya. -EDISI UKAS