KUCHING: Nembiak ari ruang bilik bepenatai pemisi RM1,500 ke baruh ti nampung pelajar ba empat institusyen tinggi enggi Sarawak nengah Skim Pelajar Tinggi Pechuma Sarawak (FTES) deka nerima elaun RM15,000 ungkup endur diau enggau belanja sida.

Menteri Pelajar, Inovasyen enggau Pemansang Penau (MEITD) Sarawak, Dato Sri Roland Sagah Wee Inn nerang, RM5,000 ari penyampau nya ungkup endur diau deka dibayar terus ngagai unit rumah ba universiti nya lalu laluh iya deka dipasuk ngagai akaun nembiak nengah S Pay Global ungkup belanja sida.

“Ari RM15,000 tu, RM5,000 deka diungkup mayar alai diau ke alai penyampau tu deka terus diberi ngagai unit rumah ba tiap institut Pelajar Tinggi Sarawak ngambi sida ngatur alai nembiak diau.

“Laluh RM10,000 deka dipasuk terus ngagai akaun nembiak nengah S Pay Global,” ku iya maya nyimpul jaku opis menteri iya ba Aum Ketiga Penggal Keempat DUN Sarawak Ke-19, Hari Satu.

Nitih ku iya, 64 kus udah dikemendar ba empat buah institusyen nya lalu Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg deka madah silik bekaul skim nyengkaum rintai kus kena 18 Disember tu di DUN Sarawak.

Maya aum media pengudah nyimpul jaku ba aum DUN nya, iya nimbal tanya bekaul penyampau agih belanja ke disedia ungkup FTES.

Nambah ke jaku iya, iya madah, agih belanja sepenyampau RM250 juta ke diungkup bepelasarka guna ke bendar, dibanding penyampau dipelaba keterubah RM450 juta.

“Keterubah iya, tu penyampau ke dipelaba, tang pengudah ngira penyampau nembiak ke tau nerima sereta nembiak ke endang bisi, ungkup belanja nya dikurang,” ku iya nerang.-EDISI UKAS

Pemberita: Nur Nabilla
Gambar: Jaed Tepus & Leya Ameera