KUCHING: Pengawa veteran soldadu enggau raban terabai menua ti udah berambun nyawa terus nyadi pugu negap pengelantang Sarawak ti nyaga pengelikun ba jeman mar agi dibanding jeman komunis.
Sapit Menteri ba Opis Premier Sarawak (Pekara Korporat, Pemadah enggau UKAS), Datuk Abdullah Saidol madah, rayat diatu ngasai pengelantang asil raban dulu ti udah berambunka nyawa, tang musuh ke diatu enda dipeda.
“Suba raban soldadu beperang ba kampung, diatu perang nyadi sedandang, musuh datai ba nengah dadah, salah pengawa, scam enggau disiplin,” ku iya maya bejaku ba Pengerami Makai Lemai Pengasih Serimbai Hari Bujang Berani ditu, Hari Dua.
Iya madah, rayat diatu napi musuh ti enda berupai, baka salah guna dadah ti ngujung penyalah bukai sereta kedai judi ónline ti ngeruga rayat.
“Tu musuh jeman diatu. Sida ngena pengelantang ke udah diberi bala bujang berani, tang salah guna nyentuk ngeruga rayat empu,” ku iya.
Nya alai, Datuk Abdullah ngarap gerempung veteran ulih ngesan tanggungpengawa ngembing rebak biak bekaul disiplin, patriotisme enggau nilai nasional.
Ke simpul jaku, iya ngelalau rayat lebih agi raban biak belemati ke pengelantang ti udah diasai diatu.
Sama datai ba pengerami nya, Kaban Kunsil Nengeri (ADUN) Ngemah Anyi Jana, Penyanding Penemu Pansik Sains Sarawak, Tan Sri Datuk Patinggi (Dr.) Alfred Jabu Numpang, Penyanding Penemu ba Opis Premier Sarawak ti mega Chairman Swinburne University of Technology Sarawak Datuk Amar Jaul Samion, Presiden Gerempung Veteran Soldadu Kor Renjer (PVTKR), Lt. Kol (B) Mohd Melintang Abdullah sereta temuai dipebasa ke bukai.-EDISI UKAS
