Menteri Industri Pemakai, Komoditi Enggau Pemansang Kandang Menua Sarawak Dato Sri Dr Stephen Rundi Utom madah, diatu berati ke komuniti peladang sereta penyereta ari raban biak ngambi nyungkak bekal pemakai nengeri enggau pengelantang rayat menua pesisir.
Pengawa tu, ku iya, nyerangkung pemansang kandang betanam betupi khas, pengawa bekenaka teknologi moden nyengkaum IoT, mekanisasi bumai, sereta reformasyen industri dikena nempa pengawa betanam betupi ti kondusif agi, engkeman sereta ngerindu ati rebak baru.
“Kitai deka raban biak meda pengawa betanam betupi ukai kereja ke pedis tauka kamah, tang industri ti ulih ngasil penatai pemisi besai, seriris enggau bekenaka chara moden enggau ekosistem ti betul,” ku iya.
Iya madah munyi nya maya aum media pengudah nyimpul jaku ari opis menteri iya ba Aum Ketiga Penggal Keempat Kunsil Nengeri (DUN) Sarawak Ke-19, Hari Dua.
Nambah ke jaku iya, iya madah, perintah andal ba pengawa ngemansang Sarawak nyadi tibang padi menua enggau juluk ati ngeluar 450,000 tan metrik setaun.
Iya mega madah perintah mega udah nengkebang model bumai Design, Build, Operate and Transfer (DBOT) sereta numbuh Kaunsil Padi Sarawak dikena nyeraris industri nya enggau chara ti komprehensif.
