KUCHING: Belanja sepenyampau RM2.2 bilion dikena bejalaika 703 projek betanam betupi naka diatu ba selampur Sarawak.
Menteri Industri Pemakai, Komoditi enggau Pemansang Kandang Menua Sarawak, Dato Sri Dr Stephen Rundi Utom madah, projek tu nyerangkung jalai menua pesisir enggau kebun, ban tebing tasik, ngintu tebing sungai, parit betanam betupi, sereta projek infrastruktur ti bekaul ba selampur Sarawak.
“Naka Oktober 2025, 417 projek udah tembu digaga, lalu projek ke bukai benung digaga ba mayuh renggat,” ku iya.
Iya madah munyi nya maya nyimpul jurai opis menteri iya ba Aum Ketiga Penggal Keempat Kunsil Nengeri (DUN) Sarawak Ke-19, ditu, Hari Dua.
Ku iya, Opis Menteri Betanam Betupi enggau Jamin Bekal Pemakai nengah Langgur Pemansang Malaysia Lumpar Ke-12 (RMK-12) udah ngemendar agih belanja sepenyampau RM14.0 juta dikena nyeruri dua skim betanam betupi Opis Entali Ai enggau Parit (DID) iya nya Mid Sadong III Lubok Trangas di Gedong enggau Paya Mending di Serian disadang belabuh suku keterubah 2026.
Ngenang pasal pejalai pengawa ngaga jalai kebun di Sarawak, iya nerang opis menteri iya udah ngungkup RM111 juta dikena ngaga lebih 400 projek jalai kebun di selampur Sarawak, nyerangkung penyauh lebih ari 1,800 kilometer.
Projek pemansang jalai kebun tu, ku iya, deka ditampung ba taun baru. -EDISI UKAS
