KPWK NEGAP EFS, BIB Nengah Pelasar Digital Belabuh 2026
KUCHING: Opis Menteri Pemansang Indu, Nembiak Mit, enggau Pengelantang Komuniti Sarawak (KPWK) deka negap pelasar nengah tali arus Servis Pengelantang Rama Begulai tauka ‘Integrated Social Wellbeing Services’ manggai Januari 2026.
Menteri ba opis menteri nya, Dato Sri Fatimah Abdullah madah, pelasar nya deka nambah pejalai Endowment Fund Sarawak (EFS) enggau Bantu Indai Beranak (BIB) nengah ngemuntang proses peminta bantu rama nengeri enggau lengkas, sikar sereta ngelantangka penguna.
"Pengawa ngemanah tu deka ngerumban peminta, nambah pemaik, ngelengkaska agih belanja," ku iya.
Iya madah munyi nya maya nyimpul jaku ari opis menteri iya ba Aum Ketiga Penggal Keempat Kunsil Nengeri (DUN) Sarawak Ke-19, Hari Dua.
Dato Sri Fatimah madah, kenyau dipejalai taun 2019, EFS udah meri pemaik ngagai 141,869 penerima, lalu BIB mantu 90,504 indai kenyau 2020.
Ku iya, berengkah 1 Januari 2025, Affin Bank ngaduka EFS 2.0 ti nyendiaka pakej simpan RM1,000 ngagai tiap anak mit Sarawak ti nyerangkung RM550 ba dalam Affin Islamic Term Deposit-i enggau RM450 ba dalam Affin Emas Account-i.
Pakej tu, ku iya, mega nyengkaum dilindung takaful pechuma sepenyampau RM10,000 ungkup siku ari apai indai enti bisi penusah pemati ketegal penusah bebadi tauka timpang pendiau seumur idup ba taun keterubah anak mit ada.-EDISI UKAS
