SIBU: Perintah Sarawak meri RM4,487,903 duit pampas ngagai pengempu tanah ngaul projek ngaga jalai baru ari Teku–Pasai Siong ke Kemuyang, Sibu nengah Projek Rayat.

Sapit Premier Sarawak, Datuk Amar Awang Tengah Ali Hasan, madah pengawa ngerenchah tanah enda ulih diseliah ba projek infrastruktur ungkup pemaik rayat, nyengkaum jalai alun, bekal ai enggau karan serta pengawa ngaga jematan.

Ku iya, perintah enda ngambi tanah rayat pechuma laban pengawa diadu nitih undang-undang Kanun Tanah Negeri Bab 81 enggau Perkara 13 Konstitusyen Perintah Besai.

“Tu mungkur 181 chek ngagai 170 penerima lalu perintah deka meri surat pala tanah seksyen 18 Kanun Tanah Negeri, ti nadai chukai tanah, dikelaung premium, hak ngempu tauka perpetuity.

“Nadai siku ulih diambi reta pia aja kelimpah nitih undang-undang, lalu nadai undang-undang dikena ngambi reta ngena chara mejal sereta nadai pampas ti chukup,” ku iya.

Iya madah munyi nya nengah teks jaku dibacha Sapit Menteri Perambu Mengeri, Pengatur Tanah enggau Rampa Menua, Datuk Len Talif Salleh serimbai Program Nyua Gazet Rizab Komunal Bumiputera Seksyen 6 Kanun Tanah Negeri, Surat Pala Tanah Seksyen 18 Kanun Tanah Negeri (KTN) enggau Chek Pampas Tanah Bagi Menua Sibu ditu, Hari Empat.

Ku iya, semua pampas ditisih Opis Tanah enggau Survei Sarawak bepelasarka rega diatu, nyengkaum utai tanam, struktur begunan enggau pemesai tanah direnchah projek.

Datuk Amar Awang Tengah madah perintah ransing bejalaika projek pemansang pemun dikena ngedut takah pemansang mengeri enggau menua pesisir, kelimpah nyungkak pemansang ekonomi menua.

“Pemansang infrastruktur pemun baka jalai alun, bekal kuasa karan enggau ai tu, patut terus digaga berenggat.

“Perintah Sarawak deka nentuka peranak menua pesisir mega ulih ngasai asil pemansang, setipak pemansang rayat ke diau ba mengeri,” ku iya.

Iya mega madah, naka 31 Oktober 2025, sepenyampau 106,467 lot individu udah mujur disukat ti mungkur 127,016 hektar (313,863 ikar) pemesai.

Lalu bisi 34,507 lot udah diberi surat pala tanah nengah Seksyen 18 Kanun Tanah Nengeri enggau 48,029 hektar (118,682 ikar) pemesai.

Kelimpah ari nya, program nya mega mandangka pengawa nyua 195 surat pala tanah Seksyen 18 enggau pemesai abis nadai 397.84 hektar (983 ikar) ngagai 131 penerima.

Program sama, bela ngemata pengawa nyua lima chek Tanggungpengawa Rama Korporat (CSR) sepenyampau RM35,000 ngagai Balai Raya Kampung Banyok, dua JKKK Kampung Banyok, Kapitan Loh Hui Kiong enggau Tuai Rumah Charlie Jengging.

Sama datai, Kaban Kunsil Nengeri (ADUN) Tamin Ir Christopher Gira, ADUN Ngemah Anyi Jana, Penulung Direktor Nisih Opis Tanah enggau Survei Sarawak Sr Alifian Bawi, Penguasa JTS Bagi Menua Sibu Chua Soh Kee, Sapit Residen Bagi Menua Sibu Christopher Ranggau Unting enggau Direktor Opis Pemansang Nengeri Sarawak Dato Jasni Jubli. -EDISI UKAS