Penerima Belanja Rumah Sembiang Dipinta Nganjung Ripot Projek
KUCHING: Perintah Sarawak nengah Unit Pekara Pengarap Bukai (UNIFOR) minta semua penerima belanja rumah sembiang di nengeri tu meri kerejasama enggau nyendia ripot pemansang projek dikena nentuka tetiap projek ti dipejalai mujur digaga sereta nyapai tuju.
Sapit Premier Sarawak ti mega Menteri Pengatur UNIFOR, Datuk Amar Douglas Uggah Embas madah, bisi 154 projek ti apin nganjung ripot bekaul belanja diberi.
“Nyadi, kitai minta sida tu meri ripot ngagai kitai lengkas laban kitai bisi polisi.
“Keterubah, enti belanja taun nya bedau dikena, kitai enda meri taun dudi.
“Pia mega ungkup projek ti nadai meri ripot laban tu beguna. nya ngaul akauntabiliti enggau atur perintah ti ditetap,” ku iya maya dirandau media pengudah Program Nyua Chek Renggat Ketiga 2025 UNIFOR di Wisma Bapa Malaysia, Hari Empat.
Datuk Amar Douglas Uggah madah pengawa nya beguna endar nentuka tetiap projek ti nerima belanja dipatau rat sereta nitih prosedur audit perintah.
“Ripot tu beguna endar laban audit deka nemu pemansang projek, pekara ti udah nyadi, sapa ti bulih pemaik.
“Enti Yang Berhormat (pengari rayat) ulih nentuka penerima meri ripot lengkas, nya manah agi," ku iya.
Iya mega madah UNIFOR deka nampung kerejasama enggau Opis Kereja Raya (JKR) nengah ngaul Quantity Surveyor (QS) dikena nisih ungkus tetiap projek rumah sembiang.
Insiatif nya, ku iya, beguna dikena nentuka projek digaga ngena chara berurun enggau bepelasarka tisih profesional.
Datuk Amar Douglas Uggah mega ngingatka bekaul isu chek bantu ti kala diripot abis timpuh laban enda disua jampat.
Nya alai iya madah pemesai guna nyua tumu ngagai penerima dikena ngerumban pejalai projek di menua.
Ba program tu, sepenyampau RM40.5 juta diagih ngagai 51 pengari rayat dikena bejalaika 138 projek ngaga baru tauka nyeleti rumah sembiang pengarap bukai di selampur Sarawak.
Sama datai, Sapit Premier Sarawak Datuk Amar Profesor Dr. Sim Kui Hian, Menteri Pengangkut Sarawak, Dato Sri Lee Kim Shin, Menteri di Opis Premier Sarawak Dato Sri John Sikie Tayai, Sapit Menteri Pengerai, Dato Lukanisman Awang Sauni, Sapit Menteri Pengangkut Sarawak (Langit & Jalai) Datuk Dr. Jerip Susil enggau Direktor UNIFOR Dato Georgina Apphia Ngau.-EDISI UKAS
