KUCHING: Servis Perintah Sarawak (SCS) beterima kasih ke Bantu Khas Belanja (BKK) sepenyampau dua bulan batang gaji baka disebut Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg ngaul penyampau RM131 juta.

Sekretari Perintah Sarawak, Datuk Amar Mohamad Abu Bakar Marzuki madah, tu siti ari pengawa ngenang pengepuh orang gawa Perintah Sarawak lalu berita manah tu udah tentu nyungkak agi pengawa enggau chukup pengeransing sereta profesionalisme.

"Aku ngari semua raban Servis Perintah Sarawak meri terima kasih ngagai Perintah Sarawak pegai Premier Sarawak ke penerang Bajet Sarawak Taun 2026 maya Aum Kunsil Nengeri (DUN) Sarawak kena 3 Disember tu tadi.

"Terima kasih mayuh ngagai Premier Sarawak ti seruran siru sereta meri sukung tegut ba pengeransing negap pengulih enggau kapasiti Servis Perintah Sarawak ungkup nentuka servis ti efektif, efisyen sereta sikar.

"Inisiatif ke dirintai ba Pugu Strategik Ke Semilan: Negap Pengulih Perintah enggau Pejalai Servis Perintah,” ku iya nengah siti penerang ba Facebook rasmi iya Hari Lima.

Kelimpah ari nya, Datuk Amar Mohamad Abu Bakar madah, insentif tu diumba tanggunpengawa ti sama pemesai iya.

Nya alai, iya ngelalau semua orang gawa perintah ngambi terus ransing, negap daya idup kereja tikas tinggi sereta gawa ba siti tim nuju Sarawak ti mansang agi sereta lantang.

"Aram kitai sama nentuka tiap inisiatif Perintah Sarawak digaga enggau pemaik ti nyengala ngagai rayat.

"Enggau pengeransing begulai sereta semangat SCS One Team, aku andal Servis Perintah Sarawak deka majak nyungkak nengeri tu mansang nyadi sebuah kandang menua ti maju, inklusif sereta tan,” ku iya.-EDISI UKAS