SIMANGGANG: Tiga sekula ba sitak Sri Aman udah nerima chek bantu Perintah Sarawak sepenyampau RM370,000 diberi nengah Unit Pengarap Bukai (UNIFOR).
Chek nya udah disua Sapit Menteri Pelajar, Inovasyen enggau Pemansang Penau, Datuk Francis Harden Hollis ba Pengerami Apresisasyen 'Lukean Legacy' ti diatur di Sekula Sekondari (SMK) Saint Luke ditu, Hari Empat.
Penerima keterubah SMK Saint Luke udah nerima chek UNIFOR sepenyampau RM200,000 lalu dua penerima iya nya Sekula Primari (SK) Saint Luke sereta SK Saint Lawrence nerima chek UNIFOR sepenyampau RM90,000 enggau RM80,000.
Datuk Francis Harden ke mega Kaban Kunsil Nengeri (ADUN) Simanggang ba pengerami nya mega madah ke pejalai Program Transformasyen Menua Pesisir (RTP) ngaga padang bol SMK Saint Luke beungkus RM300,000.
Iya bela madah agih belanja Projek Mit Menua Pemansang Pesisir (MRP) ungkup taun 2026 sepenyampau RM30,000 ungkup Gerempung Apai Indai enggau Pengajar (PIBG) SMK Saint Luke.
Iya mega ngelalau raban nembiak lebih agi ke deka peresa Sijil Pelajaran Malaysia (SPM) ngambi nampung pelajar ke renggat Institusyen Pelajar Tinggi (IPT).
"Aku meransang nembiak biak Sarawak ngerebut peluang inisiatif pelajar pechuma ba renggat Ijazah Sarjana Muda sepengelama tiga taun ti disediaka Perintah Sarawak ba empat IPT enggi nengeri belabuh taun 2026.
"Empat IPT enggi Sarawak iya nya Universiti Teknologi Swinburne Kampus Sarawak, Universiti Curtin Malaysia, Universiti Teknologi Sarawak (UTS) enggau Kolej Universiti i-CATS," ku iya. -EDISI UKAS
