KUCHING: Borneo International Robomaster Forum & Competition 2025 ti diatur kena 5 ngagai 6 Disember negap inisiatif Sarawak ngemansangka rebak biak ti landik teknologi enggau kompeten ba bidang digital.

Menteri Pelajar, Inovasyen enggau Pemansang Penau Sarawak, Dato Sri Roland Sagah Wee Inn madah, perintah ransing negap penau menua ba bidang injiniring, automasyen enggau teknologi nengah bemacham program pemansang STEM.

“Sarawak ngemerat pengawa nempa pengereja pengawa ti landik ba bidang digital, meri peransang penau ba injiniring, robotik, enggau automasyen, negap pelajar STEM di semua sitak, sereta nentuka akses ngagai pelajar bekualiti ti sebela, lebih agi ba semua kandang menua Sarawak,” ku iya.

Iya madah munyi nya nengah teks jaku ti dibacha Sapit Sekretari Mendam MEITD, Anielia Siam maya bejadi program nya di Kolej Universiti i-CATS ditu, Hari Empat.

Iya madah, bisi lebih 380 penyereta ari Malaysia, Brunei enggau Singapura ukai semina mandangka pengerindu besai ba robotik tang mega negap rentayan kerejasama serantau ti besai reti ungkup pemansang ekosistem inovasyen Sarawak dudi hari.

Ku iya, opis menteri seruran nerima industri laban nya deka ngenapka pengawa ngemaru pelajar sereta nempa pengulih penau timpuh panjai.

Raban penyereta biak ke ngambi bagi ba Robomaster, Drone Soccer, Drone Racing atau Sumo Robot ukai semina bepekit, tang peluang dikena nyerungkai pengulih diri sereta nyikap diri nyadi injinia enggau innovator, ku iya.-EDISI UKAS

Pemberita: Betrice Britney Dee
Gambar: Betrice Britney Dee