KUCHING: Unit Komunikasi Awam Sarawak (UKAS) nerima penemuai basa ari deligit Opis Komunikasyen Komuniti (J-KOM) ba Indu Opis UKAS ditu, Hari Lima.
Tuju penemuai basa nya nempa pelasar besai ungkup dua agensi dikena merambu komunikasyen dudi hari, lalu ngerandang peluang kerejasama strategik ti berurun, nemban sereta meri pemaik ngagai rayat.
Deligit J-KOM ti betuai ke Direktor J-KOM Zon Sarawak, Ajes Tuah disambut Direktor UKAS, Awang Putrayusrie Awang Redzuan.
Ba penemuai basa nya, J-KOM mega meri penerang ti komprehensif bekaul tanggungpengawa opis nya, kelimpah bejuraika langkar perambu komunikasyen strategik ungkup pejalai deka datai.
Penemuai nya mega nyadi nalan besilih penemu, bekunsi peneleba sereta nyerungkai chara pemadu manah ba ngenegap sistem nabur penerang ti inklusif agi, efektif sereta responsif ungkup guna rayat.-EDISI UKAS-
