MIRI: Miri Port Authority (MPA) udah ngelanchar perengka guna Shore Power tauka Cold Ironing keterubah di Miri, lalu negap pengawa Sarawak nuju operasyen penyangkai kapal karbon beresi enggau teknologi maritim gadung.

Pengawa bejadi nya mega bela bisi diatur pengawa nyain kerejasama entara MPA enggau TotalEnergies EP Malaysia, nyadi inisiatif dikena negap strategi bekenaka kuasa beresi ba sektor maritim Miri.

Sekretari Politik Premier Sarawak, Padang Semat, ngari ke Chairman Kaunsil Penyangkai Kapal Miri madah, teknologi nya nyadi penyungkak transformasyen industri maritim lebuh kapal badu bepanggai ba generator diesel maya sangkai.

“Lalu nya deka ngurangka pemansut karbon, penanggul bunyi sereta nyungkak pengelikun operasyen, seriris enggau juluk Sarawak ti deka nempa agenda kuasa beresi,” ku iya maya bejaku bejadi ke program nya di Miri Port Authority Crew Change Terminal (MPACCT), Hari Empat.

Iya mega madah, perengka guna nya asil kerejasama MPA–TotalEnergies EP Malaysia ti ditanggam kena Mei 2025, ke alai TotalEnergies melanja ngelekat unit Shore Power ba Dermaga 5 MPACCT.

Kelimpah ari nya, teknologi tu ngulihka kapal nerima kuasa karan terus ari terminal, lalu ngemanah kualiti angin sereta endur gawa ti likun agi.

MPA merambu ngerembai perengka guna nya ngagai semua dermaga minyak enggau gas di MPACCT sereta dermaga kargo Kuala Baram, ngangkatka Miri nyadi hab besai penyangkai kapal gadung di utara Sarawak.

Inisiatif tu mega nyukung juluk ati PCDS 2030 ngambi ngurangka 25 peratus pemansut karbon di terminal penyangkai kapal sereta nyaup juluk ati Malaysia nyapai karbon beresi manggai 2050.

Progaram nya mega ngemataka pengawa ngentak pal tanda di Dermaga 5 nyadi kelai kerejasama strategik MPA–TotalEnergies belabuh sereta nyadi chuan ngagai kompeni PSC bukai di Miri.-EDISI UKAS