KUCHING: Bup Biografi ‘Abang Johari: Sarawak’s First Premier’ dikarang Profesor Universiti Sydney, Melbourne enggau Universiti Malaysia Sarawak (UNIMAS), Michael B. Leigh deka nyadi malin rebak diatu enggau dudi hari mereti ke pengawa tuai sereta pemansang moden Sarawak.

Yang di-Pertua Negeri Sarawak, Tun Pehin Sri Dr. Wan Junaidi Tuanku Jaafar madah, bup biografi nya mai reti chukup besai ukai semina nurai sejarah, tang nyadi pelasar besai mereti ke tunga kuing pemansang nengeri.

“Dokumentasyen pengidup enggau penau tuai Premier Sarawak ngayanka pejalai ti mayuh visyen, puh enggau ransing gawa ke pemansang Sarawak, nyengkaum ba transformasyen digital, strategi ekonomi enggau negap autonomi penatai nengeri.

“Inisiatif iya ba infrastruktur, ngemansangka komuniti menua pesisir enggau ngerenchah bemacham ekonomi mandangka pengeransing iya nempa Sarawak ti moden, tan sereta inklusif.

“Penau iya nyadi tuai semampai berati ke rayat Sarawak, nyentuk selampur nengeri, ari Tanjung Datu ngagai Lawas, dikena nentuka nadai komuniti dikelaung," ku iya.

Iya madah munyi nya ba program bejadi bup nya di Dayak Cultural Foundation (DCF), Hari Lima.

Tun Pehin Sri Dr. Wan Junaidi meri terima kasih ngagai DCF laban bejalaika inisiatif ngeluarka bup biografi tu sereta muji pengepuh Profesor Michael, siku sarjana ti ngembuan rikod panjai mansik landskap politik enggau rama Sarawak kenyau ari 1960-an.

Program tu bela digulu Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg.

Sama datai, bini Yang di-Pertua Negeri Sarawak Toh Puan Datuk Patinggi Fauziah Mohd Sanusi, anak Premier Sarawak Dayang Norjihan, dua Sapit Premier Sarawak Datuk Amar Douglas Uggah Embas enggau Datuk Amar Profesor Dr. Sim Kui Hian, Speaker Kunsil Nengeri (DUN) Sarawak Tan Sri Datuk Amar Mohamad Asfia Awang Nassar, Ex Sapit Kepala Menteri Sarawak Datuk Patinggi Tan Sri Dr George Chan Hong Nam sereta bini Datin Patinggi Puan Sri Datuk Wira Lorna Enan Muloon Chan, Ex Sapit Kepala Menteri Sarawak, Datuk Patinggi Tan Sri (Dr) Alfred Jabu Numpang sereta bini Tan Sri Dato' Sri Empiang Jabu, Chairman Yayasan Tun Jugah enggau Pemegang Amanah Pengurusan DCF, Datuk Patinggi Tan Sri Leonard Linggi, bala Menteri Perintah Sarawak, Sekretari Perintah Sarawak Datuk Amar Mohamad Abu Bakar Marzuki, bala Sapit Menteri Sarawak enggau pemesai ke bukai.-EDISI UKAS