LIMBANG: Bazaar Krismas Tamu Medamit 2025 terus ditapat mensia mayuh lebuh beratus pengusung nedat Dewan Terbuka Medamit kena Hari Tiga.
Program ninting taun nya nyadi pelasar besai ngelaku produk lokal, negap ekonomi pedaja enggau ngerapit kaul komuniti menua nya.
Bazaar nya udah dipenyadi Kaunselor Ugak Sanggau, ti ngari ke Kaban Kunsil Nengeri (ADUN) Batu Danau Dato’ Paulus Palu Gumbang.
Ba teks jaku dibacha Kaunselor Ugak, Dato Paulus meri terima kasih ngagai Komiti Pengatur ti udah kiruh gawa nentuka bazaar nya terus nyadi program nemban ba kalinda komuniti Medamit.
Iya mega madah, kaul regas pedaja, komuniti enggau voluntia mandangka penegut kerejasama ti bisi dia.
“Pemujur ngatur Bazaar Krismas tu ukai semina mandangka semangat kerejasama komuniti Medamit aja, tang mega mantaika penegap penyerakup enggau pengelantang ti dikemisi kitai,” ku iya.
Bazaar sekali tu bejualka bemacham produk lokal baka pemakai asal, kraf jari, ngepan etnik, asil betanam betupi enggau tepa hari besai.
Kelai sukung ngagai pengatur, Kaunselor Ugak mega ngemendarka agih belanja RM10,000 ari Dato’ Paulus dikena nyaup belanja ngatur program enggau nyadi peransang ba program dudi hari. -EDISI UKAS
