BINTULU: Perintah Sarawak semampai ngemerat pengawa matau rat nentuka genap projek pemansang ulih tembu nitih taga sereta nyeliahka projek nya napi status sakit.
Sapit Premier Sarawak, Datuk Amar Douglas Uggah Embas madah, inisiatif semitan enggau berurun beguna amat nentuka pemujur atur pengawa sereta nyamin asil ti bisi kualiti.
“Pekara ti dikemerat kitai diatu iya nya nentuka semua projek ti benung dipejalai ulih tembu nitih timpuh lalu enti ulih, tumu agi.
“Kitai meseti bisi disiplin enggau entap penemu ngambi nadai projek sakit,” ku iya nyemetak.
Iya nyebut jaku nya ba pengawa mantar bejadi jematan ngelayang Batang Kemena (Sebauh) kena Hari Enam.
Projek dipatau JKR Sarawak nya dikena nambah rentayan jalai enggau akses menua pesisir ba sitak Sebauh enggau ngelingi nya.
Menteri Infrastruktur enggau Pemansang Penyangkai Kapal Sarawak nya madah, naka diatu semina dua projek dikelala napi penanggul tang andal ke penanggul nya ulih diputar nengah pengawa nyeraris pekara teknikal enggau mutar lengkas.
Ku iya, pengawa nambah kualiti bejalaika projek mega bepanggai ngagai pengawa ngena kereban pansik ti menyana agi sereta kerejasama rat entara agensi pengatur dikena ngelala sereta mutar penanggul teknikal. - EDISI UKAS
