‘Sarawak Baka Rumah Kedua Aku’ - Tengku Ampuan Pahang
KUCHING: “Sigi amat, Sarawak udah nyadi rumah kedua aku, lalu kita semua baka petunggal aku.
“Tu ukai semina kaul bebakih, tu kaul pengasih ti panjai enggau chukup tegut entara Pahang enggau Sarawak, dua nengeri ti dipegulai nengah pesaka asal, bela bebasa ke pangan diri enggau ngembuan penyayau.”
Nya pekara dipadah Kebawah Duli Paduka Baginda Tengku Ampuan Pahang Tunku Azizah Aminah Maimunah Iskandariah Almarhum Sultan Iskandar Al-Haj maya Bejadi Seminar Borneo International Textile Festival (BiTF) 2025, ditu, Hari Satu.
Ku Baginda, pemanah rayat Sarawak ngasuh tiap kali datai baka pulai ngagai rumah diri empu, dirami lalu dikelalu enggau chukup basa sereta pengasih.
Ku Baginda, penemuai sekali tu ukai penemuai baginda nyadi Kerabat Diraja Pahang, tang nyadi nembiak ti belajar seni pesaka Sarawak ti kaya enggau nyelai.
“Lalu ketegal nya mih aku nerima peminta Sarawak ngiring sereta meri inspirasyen, tang kebendar iya, aku mih nembiak ditu laban Sarawak nyadi siti ‘librari’ kraf lalu aku semina ngerebak tiap lambar, meda enggau chukup pengaga.
“Kita bebasa ke aku sereta nerima penatai aku ba dunya pesaka kita tang ke bendar kita mih pengajar aku.
“Nyadi, anang ngasai ke aku tuai tang kita patut ngasai ke aku tu baka siku nembiak ke duduk begulai enggau kita," ku Baginda baru.
Baginda beterima kasih ke pemanah Sarawak ti sedia mantu Pahang ngelaku penyelai daya idup, kraf jari enggau seni dua nengeri lalu iya ngarap terus meruan nyadi 'jematan' nyambung kaul bakih ti ditanggam tu.
Sama datai, Sapit Menteri Dagang Temuai, Industri Kreatif enggau Seni Pemerindang Sarawak Datuk Snowdan Lawan ke ngari Menteri Dagang Temuai, Industri Kreatif enggau Seni Pemerindang Sarawak sereta temuai dipebasa ke bukai. -EDISI UKAS
