Tengku Ampuan Pahang Minta Seni Pasu Sarawak Diidupka Baru
KUCHING: Kebawah Duli Paduka Baginda Tengku Ampuan Pahang, Tunku Azizah Aminah Maimunah Iskandariah Almarhum Sultan Iskandar Al-Haj madah seni pasu Sarawak patut diangkat enggau diidupka baru nyadi pesaka daya idup ti meseti dijaga.
Baginda madah ke seni pasu nya ngembuan penyelai kediri enggau chura motif rayat menua, lalu nyadi pesaka berega ti patut ditampung rebak dudi.
“Aku meda seni pasu majak enda dikeingatka agi di Sarawak, nya alai aku minta seni pasu tu diangkat baru laban aku agi ingat, pasu tu mih ke suah dibai pulai ke rumah enti aku nemuai ngagai Sarawak sereta agi bisi ayan ba rumah aku di Kuantan.
“Aku minta idupka baru utai ke chukup nyelai ari Sarawak laban pasu nya ngembuan chura motif rayat ditu, lalu aku ngarap Perintah Sarawak ulih mutar pekara nya," ku Baginda.
Baginda madah munyi nya maya bejaku serimbai bejadi Seminar Borneo International Textile Festival (BiTF) 2025, ditu, Hari Satu.
Ku Baginda, pekara tu ulih dipejalai Perintah Sarawak ke tebilang enggau saup sida kelebih agi ba pengawa ngintu penyelai pesaka asal.
“Sarawak chunto baka ni pesaka patut diperati, bakani pesaka patut dikemansang lalu ditampung ke alai Sarawak bisi institusyen ti nempa pemansang pesaka dudi hari.
“Lebuh semua elemen tu disegulai, kitai nempa siti ekosistem ti ngentapka pengawa begiga belanja, negapka identiti sereta rayat.
“Aku muji Perintah Sarawak laban meranak puku ukai semina ba institusyen, tang mega ba rumah jil.
"Lebuh aku minta belanja numbuh Palan Songket ba Jil Puncak Borneo, sukung nya terus lengkas diberi,” ku Baginda baru. -EDISI UKAS
