KUCHING: Perintah Sarawak ngungkupka belanja sepenyampau RM5 juta ninting taun dikena ngaga kelas pintar ba Sekula Primari Bansa China ba kandang menua tu.
Sapit Premier Sarawak, Datuk Amar Profesor Dr Sim Kui Hian madah, sepenyampau 369 kelas di Sekula Primari Bansa China (SJKC) deka nerima pemaik ba renggat keterubah agih belanja nya.
“Ba renggat keterubah, penyampau kelas SJKC di Bagi Menua Kuching, Kota Samarahan enggau Serian deka diseleti nyadi kelas pintar iya nya 166, Bagi Menua Sri Aman enggau Betong sepenyampau 42 kelas, Sibu, Mukah enggau Kapit ngaul 68 iti kelas.
“Kelimpah ari nya, Bagi Menua Bintulu deka ngaul 32 iti kelas, Miri enggau Limbang 38 kelas enggau Sarikei 23 iti kelas,” ku iya nerang.
Iya madah munyi nya ba aum media Komiti Penyanding Penemu Sekula China Sarawak, ditu, Hari Tiga.
Dipadah, Gerempung Begempung Kaunsil Atur Sekula Primari Bansa China Sarawak deka ngelekat Televisyen Pintar (Smart TV) pemesai 75 inchi tauka 86 inchi nitih ke penyampau nembiak ba kelas nya.
Ku Menteri Pengerai Mensia Mayuh, Pengawa Berumah enggau Perintah Lokal Sarawak, tuju pengawa tu narak pengerindu nembiak belajar nengah teknologi enggau inovasyen ti moden agi sereta sistematik.
Berebak enggau nya, ku iya nerang, Komiti Penyanding Penemu Sekula China Sarawak deka berunding ngena sebagi ari belanja nya ba renggat kedua ila dikena meli perengka sains baka set robotik, pencetak 3D enggau dron dikena narit pengerindu nembiak sekula primari ba bidang Sains, Teknologi, Injiniring enggau Matematik (STEM).
“Chara tu meseti diberi ba renggat sekula primari, laban enti iya bepun enggau manah ba sekula primari, baru sida ulih nerus pengawa ba sekula sekondari lalu ukai nganti ngagai sekula sekondari belajar semua sekali.
“Nengah chara nya, kitai ulih terus nempa injinir sereta penau teknologi ungkup pemansang Sarawak,” ku iya baru.
Renggat kedua ba pun taun dudi deka ditandu lalu nyamin mayuh agi kelas diseleti nyadi kelas pintar ba Sekula Primari Bansa China. -EDISI UKAS
