Kaban Kunsil Nengeri (ADUN) Baleh, Nicholas Kudi Jantai madah, tu nyengkaum peranak di Baleh lebih agi Pelilih Bukit Mabong ke patut terus bekerejasama enggau tuai sereta pengari rayat sitak nya.
"Tu beguna endar dikena kitai nentuka pemansang ba Sitak tu ulih mujur dipejalai sereta meri pemaik ngagai peranak menua,” ku iya.
Iya madah munyi nya ba Pengawa Bejadi Projek Tembu Langgur Program Transformasyen Menua Pesisir (RTP) Andau Besi Rumah Goyang di Nanga Ensurai, Merirai, Hari Dua.
Berindik ari nya, ku Nicholas, projek nya sebagi ari inisiatif pemansang infrastruktur dikena ngemuntang pejalai peranak menua sereta nambah pengelikun pengangkut sungai.
Maya nya mega, iya ngemendarka agih belanja sepenyampau RM5,000 ngagai Gerempung Indu Rumah Goyang sereta RM3,000 tiap gerempung ngagai Gerempung Indu Rumah Ajat, Rumah Rentap enggau Rumah Richard.
PIBGK SK Nanga Entuloh nerima pemeri sepenyampau RM5,000 dikena ngatur aktiviti enggau kereban dikena sekula.-EDISI UKAS
