NANJING: Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg mujur datai di Nanjing ngepun penemuai gawa empat hari iya ke China berengkah sehari tu.

Penatai Premier Sarawak enggau Chairman PETROS Tan Sri Datuk Amar (Dr) Hamid Bugo, pukul 4.50 lemai jam menua nya diambat Sapit Menteri Utiliti Sarawak (Sarawak Energy Berhad enggau PETROS) Datuk Ibrahim Baki, Tuai Pegawai Eksekutif Raban PETROS Dato Janin Girie sereta deligit PETROS ke bukai.

Penemuai gawa nya dipun enggau sesyen kaul begulai enggau Jiangsu Provincial People’s Government di Xikang Guesthouse, Nanjing kena Hari Empat tu.

Tembu berandau, Premier Sarawak enggau deligit deka ngemata pengawa nyain Framework Agreement enggau Sempekat Pemereti Ati (MoU) entara PETROS enggau China Jiangsu International Economic and Technical Cooperation Group Ltd (CJI) di Indu Opis CJI di Nanjing.

Ba hari ketiga penemuai nya deka nemuai ke Suzhou Industrial Park (SIP) berati ke siti ari hab pemansang industri, teknologi enggau inovasyen pemadu nyulut di China.

Premier Sarawak disadang ninga penerang pemansang di Exhibition Hall enggau One Stop Centre, ditangkan randau enggau SIP Administrative Committee sereta ngelawa sekeda kompeni tebilang ti beoperasyen ba kandang menua nya.

SIP ke tebilang enggau ekosistem kilang pintar, automasyen enggau pansik teknologi tinggi nyadi chuan ba pengawa Sarawak ngemansangka model ekonomi bepelasarka teknologi sereta kuasa gadung, nipak juluk pemansang nengeri.

Premier Sarawak disadang pulai kena Hari Enam tu pengudah nembuka penemuai gawa di Nanjing enggau Suzhou.-EDISI UKAS