SUZHOU: Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg enggau deligit nemuai ngagai Suzhou Industrial Park (SIP) Exhibition Center ngerandang penemu baru senentang perambu disiplin, pemujur atur perintah sereta inovasyen teknologi ulih nempa siti ekosistem industri tikas dunya, Hari Lima.

Nyempulang iya, Sapit Menteri Utiliti Sarawak (Sarawak Energy Berhad enggau PETROS) Datuk Ibrahim Baki, Chairman PETROS, Tan Sri Datuk Amar (Dr) Hamid Bugo, Tuai Pegawai Eksekutif Raban PETROS, Dato Janin Girie sereta bala bukai.

Deligit Sarawak dibai meda pemandang kronologi transformasyen SIP nyadi hab industri global ti ngempung sektor kilang ngena teknologi tinggi, mengeri pintar enggau pemeruan rampa menua.

Model pelin besai tikas tinggi ti dipandang ngayanka industri, infrastruktur, alai berumah enggau menua gadung ti sebela nyadi pugu pemujur SIP.

Penerang ti diberi mega mandangka pengelebih SIP ba ngemansangka kluster industri berega, nyengkaum semikonduktor, bioperubat, automasyen, teknologi penerang sereta kuasa beresi.

Deligit bela merati pengawa bekenaka teknologi digital enggau sistem atur mengeri bepelasarka data ti nambah penyikar servis perintah, atur utiliti sereta perambu mengeri karbon beresi.

Inisiatif tu setipak enggau juluk Sarawak ke deka ngemansangka Hab Karbon Beresi Kuching (KLCH) dikena nyungkak ekonomi dudi hari.

Penemuai ke SIP Exhibition Center tu ukai semina meda pemandang, tang nyadi pelasar belajar strategik ti meri inspirasyen ngagai Sarawak ngambi ngena chara pemadu manah nitih konteks menua enggau tuju nempa industri ti ulih besemekih, teknologi maju sereta nyaga pemeruan rampa menua.

Nangkan nya, Premier Sarawak enggau deligit ngatur randau enggau Datuk Bandar, Perintah Mengeri Suzhou, Wu Qingwen.

Sama datai, Sapit Menijar Besai, China Jiangsu International Group, Deng Yajun sereta Sekretari Besai, Perintah Mengeri Suzhou, Xu Ben.-EDISI UKAS