Sarawak Berati Industri Dudi Hari, Matak Pemeranak Puku Luar
SUZHOU: Sarawak besedia merati ke pemansang industri dudi hari, nempa nengeri tu nyadi palan ditapat pemeranak puku luar ti besemekih ba rantau ASEAN.
Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, iya diatu bisi penemu baru senentang pemansang taman industri ke dilanggur, tang bebida ari perambu asal sebedau penemuai tu.
Ku iya, asil penemuai gawa tu, konsep nya deka diseraris ukai semina nengah Strategi Pemansang Pengudah COVID-19 (PCDS) 2030, tang berati ke guna ekonomi baru enggau utai ti dipadah nyadi industri dudi hari.
"Pengudah aku pulai tu, aku deka ngatur siti aum khas berandauka pekara tu,” ku iya ba aum media nangkan ngatur penemuai gawa ngagai Indu Opis GCL Group ditu, Hari Lima.
Nyempulang Premier Sarawak iya nya, Sapit Menteri Utiliti Sarawak (Sarawak Energy Berhad enggau PETROS) Datuk Ibrahim Baki, Chairman PETROS, Tan Sri Datuk Amar (Dr) Hamid Bugo, Tuai Pegawai Eksekutif Raban PETROS, Dato Janin Girie sereta deligit ke bukai.
Ba pekara tu, Premier Sarawak meda pengulih pemansang dudi hari ukai semina ba konteks serantau ASEAN, tang ba tikas global.
Nya alai, ku iya nerang, Chara enggau strategi pemansang nengeri patut dilangkar baru setipak enggau ubah landskap ekonomi pengudah meda empu pemujur nya.
"Kelimpah ari nya, kitai mega deka numbuh bemacham aktiviti ekonomi nengah beambi ulih enggau kuasa beresi sereta kuasa ulih dikena baru nyadi pugu pemansut lalu ngasilka produk moden ti ulih besemekih ari penatai nya,” ku iya.-EDISI UKAS
