AirBorneo Ngemeran Chara Kolaboratif & Progresif, Beguna Sukung Semua Ba Pun Pengawa
KUCHING: Kompeni penerebai enggi Sarawak, AirBorneo deka ngemeran chara kolaboratif enggau progresif ba pengawa kompeni nangkan tu, ti meri perati ngagai pengawa ngemanah servis enggau negap ekosistem penerebai, pengudah ngelanchar penerebai terubah sida.
Sekretari Perintah Sarawak ti mega Chairman AirBorneo Datuk Amar Mohamad Abu Bakar Marzuki madah, kompeni penerebai nya ditumbuh mandangka visyen jauh Perintah Sarawak negap infrastruktur pengangkut ungkup pengelantang rayat.
Iya meri terima kasih ngagai Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg ti udah ngatur misyen timpuh panjai negap rentayan penyambung, sereta madah AirBorneo dilanchar nyadi pengawa terubah ba pejalai jauh nuju sektor penerebai ti ulih beretan enggau bepuguka rayat.
“Tetiap pejalai enda tau enda bepun ari siti singkang. Nyingkang ke mua, kami deka terus nyerenih chara kereja enggau ngiga peluang ngemanah ngambi ulih meri servis ti manah agi ngagai rayat,” ku iya madah ngagai media pengudah pengawa ngelanchar penerebai terubah AirBorneo di Terminal VIP Padang Bilun Antarabansa Kuching kena Hari Lima.
Sama datai, Menteri Pengangkut Sarawak Dato Sri Lee Kim Shin, Sapit Menteri Pengangkut Sarawak Datuk Dr Jerip Susil, sereta Sapit Menteri ba Opis Premier Sarawak (Pekara Korporat, Pemadah enggau UKAS) Datuk Abdullah Saidol.
Datuk Amar Mohamad Abu Bakar madah, AirBorneo enda bejalai kediri, tang ngemeran model kolaboratif enggau kerejasama rat bakih strategik enggau pemekuh industri meri servis langit ti sikar enggau ulih dikeandal.
Iya nyemetak madah, kerejasama semua raban beguna endar laban nadai siti entiti ulih ngemansangka ekosistem penerebai ti entap kediri, kelebih agi di Sarawak ti mayuh pemar geografi enggau penyambung ti nyelai.
Taja ransing nyendiaka servis bisi kualiti, iya ngaku AirBorneo begunaka awak nyapai tikas ti lantang, sereta minta semua, komuniti enggau raban media meri sukung sereta mereti ke pun pengawa sida.
“Kitai enda ulih ngarap ke semua mujur ba pun pengawa. Pekara pemadu beguna, kitai terus nyingkang ke mua, ngadu manah enggau terus puh meri servis ngagai rayat,” ku iya.
Iya madah baru, komitmen AirBorneo ngetanka standard servis pemadu manah, seriris enggau realiti operasyen enggau nangkup pemeruan timpuh panjai.
Ku iya, pemansang AirBorneo deka disungkak pengawa ngaul rayat, nentuka jalai penyambung meri pemaik ti nyengala ngagai komuniti ba selampur Sarawak.
Sama datai, Sekretari Pekara Wang Sarawak Dato Sri Dr Wan Lizozman Wan Omar, Luyar Besai Sarawak Dato Sri Saferi Ali, Sapit Sekretari Perintah Sarawak (Perambu enggau Pemansang Ekonomi) Dato Sri Dr Muhammad Abdullah Zaidel, Sekretari Mendam Opis Menteri Pengangkut Sarawak Datu Wong Hee Sieng; sereta bala temuai dipebasa bukai. -EDISI UKAS
