TANJUNG MANIS: Sejarah baru diturai lebuh bilun AirBorneo mujur sangkai terubah ba Padang Bilun Tanjung Manis sehari tu, kelai pengepun pengawa kompeni penerebai enggi Perintah Sarawak ngagai menua nya.
 
Penerebai terubah sangkai pukul 9.20 pagi tadi disambut Kaban Parlimen Tanjong Manis Dato Ir Yusuf Abdul Wahab disempulang bala tuai opis enggau tuai raban bansa enggau komuniti di Padang Bilun Tanjung Manis.
 
Ku Dato Ir Yusuf, 2 Januari nya haribulan ti chukup besai reti ngagai peranak menua nya enggau pemansang kandang menua Tanjung Manis.
 
“Sehari tu hari besai sejarah ngagai Padang Bilun Tanjung Manis laban chun pukul 9.20 pagi tadi, kitai udah nerima penerebai terubah AirBorneo ke Tanjung Manis,” ku iya lebuh dirandau pemberita kena Hari Lima.
 
Iya ngarap ke servis penerebai nya ulih ditampung enggau dikerembai dudi hari, nyengkaum ngena bilun ti besai agi baka ATR dikena nambah kapasiti penumpang enggau penyikar operasyen.
 
Berebak enggau nya, taga penerebai AirBorneo sekali sehari ari Kuching ke Tanjung Manis enggau terebai pulai ke Kuching, ngena bilun Twin Otter kapasiti 16 penumpang.
 
AirBorneo nurai sejarah kediri laban semina siti nya aja kompeni penerebai dipenggi perintah nengeri di Malaysia ti ngepun operasyen rasmi ba taun 2026, seriris enggau juluk Perintah Sarawak negap rentayan pengangkut langit enggau pemansang kandang menua.
 
Ngenang pekara bekaul, Dato Ir Yusuf mega madah ke projek nangkir Padang Bilun Terbang Tanjung Manis ti dikemendarka Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg dikeandal nambah pengulih padang bilun nya endur bilun ti besai agi sangkai sereta penyampau penumpang ti mayuh agi.
 
Kelimpah ari nya, iya ngarap ke pejalai terebai ulih ditambah ngagai menua bukai baka Mukah, Bintulu, Miri, enggau ke Kuala Rajang sereta menua tasik dudi hari, sereta ekonomi tumbuh enggau sektor dagang temuai dia ranchak. -EDISI UKAS