MUKAH: Inisiatif Perintah Sarawak menggi kompeni penerebai kediri diatu meri empas terus ngagai rayat lalu negap akses pengangkut langit kelebih agi ngagai peranak menua pesisir lebuh penerebai terubah AirBorneo mujur sangkai di Padang Bilun Mukah, Hari Lima.
Kaban Kunsil Nengeri (ADUN) Tellian, Royston Valentine madah, kenang nurai sejarah nya mandangka Perintah Sarawak menggi kompeni kediri ti nyelinting pengelantang rayat, kelebih agi ba kandang menua ulu enggau pesisir.
Ku iya, inisiatif nya mandangka Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg naka ulih nentuka perengkaguna penyambung langit ti sikar agi enggau lantang ulih diasai serap komuniti.
“Kelimpah ari bepanggai ba pengangkut darat, rayat di Mukah diatu ulih milih pengangkut langit ti efisien agi, lalu ngemuntangka pejalai sereta pengawa besehari-sehari,” ku iya lebuh dirandau media.
Berindik ari nya, ku iya, AirBorneo ukai semina nambah mobiliti peranak menua pesisir aja, tang ngerandang peluang ngagai ekonomi menua nya tumbuh sereta ngeranchak sektor dagang temuai dia.
Entara perambu ti dilanggur nyengkaum ngaga perengkaguna dagang temuai di kandang tebing tasik Mukah baka pak pemakai enggau palan rekreasyen dikena matak temuai ari menua bukai.
Seraya ADUN Balingian, Abdul Yakub Arbi ti mega nepan penerebai terubah AirBorneo ke Mukah madah kepenerebai nya siti sejarah besai reti ngagai peranak Mukah.
Ku iya, servis enggau intu sekumbang nepan bilun endang ngemantupka ati, kelimpah kabin ti lantang sereta uniform kru AirBorneo ti gap enggau narit ati.
Dulu ari nya, penerebai terubah AirBorneo ngundan 55 orang penumpang ari Kuching mujur sangkai ba Padang Bilun Mukah pukul 9.20 pagi.
Sama datai, Residen Bagi Menua Mukah Datu Kueh Lei Poh, Pegawai Pelilih Mukah Peleadzman Ahip, Menijar Padang Bilun Mukah Naufal Gelong enggau Tuai Polis Pelilih Mukah DSP Rizal Alias. -EDISI UKAS
