KUCHING: Perintah Sarawak deka bejalaika tungkap komprehensif dikena nyerenih enggau ngemanah padang bilun menua pesisir nyadi sebagi ari pengawa negap penyambung langit sereta nyukung pengawa ngerembai servis penerebai serantau dudi hari.
 
Menteri Pengangkut Sarawak Dato Sri Lee Kim Shin madah, nya nyengkaum nyerenih jalai langit ke bisi ba menua pesisir ti patut dikemanah, kelebih agi ba menua ti mar dilawa nengah jalai alun tauka mod pengangkut bukai.
 
Ku iya, sekeda padang bilun menua pesisir dikuasa Perintah Besai enggau perambu ngemanah nyengkaum nangkir jalai bilun deka dikerandau enggau Perintah Besai dikena nambah kapasiti operasyen sereta tikas pengelikun.
 
Entara projek ti benung dipejalai baka nangkir jalai bilun ba Padang Bilun Bario ti disadang tembu ujung taun tu, lalu ngasuh pejalai bilun begembar injin nemban agi.
 
Dato Sri Lee nerang diatu, operasyen bilun ba sekeda padang bilun menua pesisir bisi tatak laban jalai pun pandak, ti natak kapasiti penumpang ketegal pengelikun, taja bilun ulih ngundan nyentuk 90 penumpang.
 
Ku iya, pemansang penerebai Sarawak dipejalai berenggat, perati diberi ngagai pengawa negap servis langit menua pesisir sebedau ngalih ngagai renggat pengawa nyadi kompeni penerebai serantau.
 
“Pengawa nangkan tu begunaka kitai ngasi ke atur matau tambah, nyengkaum ubah ba lisin operator langit, sereta tungkap silik bekaul bansa bilun enggau model operasyen,” ku iya madah ngagai media pengudah pengawa ngelanchar penerebai terubah AirBorneo di Terminal VIP Padang Bilun Antarabansa Kuching kena Hari Lima.
 
Dato Sri Lee nyemetak madah, semua pemutus deka digaga chara profesional belalauka tungkap pakar, sereta nambah, sebarang penerang bekaul pengawa milih bilun tauka operasyen jet serantau enda digaga berumban.
 
Ngenang pasal penerebai terubah nya, ku iya, penerebai Kuching–Mukah ngerikod 54 penumpang seraya penerebai Kuching–Tanjung Manis ditepan 15 penumpang.
 
Iya madah, penyampau penumpang nya nyadi pun pengawa ti chukup manah ngagai kompeni penerebai nya ba taun 2026, kelebih agi jalai ti beguna endar nyambung komuniti tebing tasik enggau menua pesisir.
 
Iya mega madah, Sarawak bisi juluk timpuh panjai ngerembaika servis langit ngagai menua baka Mukah, seraris enggau julukj pemansang enggau rentayan penyambung nengeri.
 
Sama datai Sekretari Perintah Sarawak ti mega Chairman AirBorneo Datuk Amar Mohamad Abu Bakar Marzuki, Sapit Menteri Pengangkut Datuk Dr Jerip Susil, Sapit Menteri ba Opis Premier Sarawak (Pekara Korporat, Pemadah enggau UKAS) Datuk Abdullah Saidol, Sekretari Pekara wang Sarawak Dato Sri Dr Wan Lizozman Wan Omar, Luyar Besai Sarawak Dato Sri Saferi Ali, Sapit Sekretari Perintah Sarawak (Perambu enggau Pemansang Ekonomi) Dato Sri Dr Muhammad Abdullah Zaidel, Sekretari Mendam Opis Menteri Pengangkut Sarawak Datu Wong Hee Sieng; sereta bala temuai dipebasa bukai.-EDISI UKAS
 
Pemberita: Alezxandria Kapple
Gambar: Ibanez Jeffery Guang