KUCHING: KV Miri Landas Youth Team nyadi champion Petronas Youth Football Championship League 2025 Kategori PSK16 pengudah ngalahka My Team X SMKAI, 2-0 ba pekit kepenudi ti diatur ba Stadium Sarawak, Petra Jaya kena Hari Enam.

Tim nya mujur nyipak gol ba minit ke-25 enggau ke-60, nentuka KV Miri Landas Youth Team menggi gelar champion.

Penuduk ketiga bela diempu Kelab Pembangunan Bola Sepak SMK Sri Matang enggau Sarikei FA.

Perais ngagai bala pemenang disua Sapit Menteri ba Opis Premier Sarawak (Pekara Korporat, Pemadah enggau UKAS) Datuk Abdullah Saidol.

Nangkan nya, ungkup Kategori PSK14, champion dipenggi Cascara Junior, Sekolah Sukan Negeri Sarawak (SSN) ba penuduk kedua seraya Mukah FA enggau Al Mateem Football Academy bekunsi penuduk ketiga.

Ungkup kategori tu, perais udah disua Direktor Opis Pelajar Nengeri Sarawak (JPNS), Omar Mahli.

Nangkan nya, sekeda anugerah individu mega disua malam tadi.

Ba PSK14, anugerah Fair Play dipenggi Kuching City Football Club Academy, Penyipak Gol Pemadu Mayuh PSK14 dipenggi Zainul Ariffin Mohd Zainuddin nengah semilan gol, Penyaga Gol Pemadu Mayuh enggi Aiman Ihtisyam Abrisam (Cascara Junior) enggau Pemain Pemadu Manah diempu Vanderan Belikau (SSN Sarawak).

Ba kategori PSK16, Anugerah Fair Play diempu NFDD Sarawak, penyipak gol pemadu mayuh diempu Mohd Aidil Ikhwan Mohamad nengah lima gol, penyaga gol pemadu manah diempu Bryan Nistelroy Joshua (KV Miri Landas Youth Team) enggau pemain pemadu manah Abdul Rafiq Rezwan Abdul Rahman ari KV Miri Landas Youth Team.

Sama datai iya nya Chairman Komiti Besai Servis Perintah Nengeri Sarawak Datu Kameri Affandi, Menijar Besai Kanan Rentayan Raban Bekaul, Kaul Strategik enggau Komunikasyen Gerup PETRONAS Khairuddin M Jaafar, Sekretari Mendam Opis Menteri Nembiak, Lumba enggau Pemansang Pedagang Sarawak Morshidi Fredrick sereta temuai bukai. - EDISI UKAS

Pemberita : Firdaus Materang
Gambar : Naseem