KOTA SAMARAHAN: Sarawak majak nyingkang negapka penuduk nyadi hab pansik enggau inovasyen tikas antarabansa nengah Konvensyen Antarabansa Sarawak SHInE 2026 diatur kena 9 nyentuk 11 September ila di Kuching.
Konvensyen nyagu sulu jaku “Advancing Science, Health, Innovation and Engineering” nyadi pelasar strategik ngempuruka pakar, pemansik, pemekuh industri sereta pengaga poisi ari menua tu enggau menua luar ungkup berandauka pemar enggau pemutar ba bidang sains, pengerai enggau teknologi.
Menteri Pelajar, Inovasyen enggau Pemansang Penau Sarawak, Dato Sri Roland Sagah Wee Inn madah, SHInE 2026 diatur mandangka perintah nengeri seruran ransing nyungkak penyulut pansik ti meri empas praktikal ngagai pemansang Sarawak.
“Konvensyen tu ukai semina peluang bekunsi penemu aja, tang pelasar nempa rentayan kerejasama ti ulih ngiga chara mutar kebendar ngagai pemar kemaya hari ba tikas lokal enggau global,” ku iya.
Iya nibar ke jaku nya ba aum media keterubah SHInE 2026 di Institut Pansik Tanah Kerapa Tropika Sarawak (TROPI), ditu, Hari Empat.
Ku iya, lebih 300 penyereta disadang ngulu konvensyen nya ti deka matak lebih 30 pengelicha pakar sereta 30 sesyen mungkur mayuh bidang kepakaran.
Iya mega madah, pengelicha antarabansa ari United Kingdom, Australia, Kemboja, Singapura enggau Taiwan ti datai mega mandangka kaul global konvensyen nya.
Konvensyen ti diatur Sarawak Research and Development Council (SRDC) enggau Sarawak Infectious Disease Centre (SIDC) mega bisi ngatur sesyen randau panel ti nyelinting pengawa ngerumban pemansang teknologi meruan sereta nambah empas inovasyen di Sarawak.
Kelimpah ari nya, penyereta mega bisi peluang enggau nemuai teknikal ke Sarawak Science Centre dan SIDC, sereta meda pemandang teknologi enggau nerangka produk inovatif pemadu baru.
Ku Dato Sri Roland Sagah, SHInE 2026 mega meri perati ngagai kaul raban nembiak nengah Program BrightSparX diatur SRDC, nyengkaum Anugerah Inovasyen BrightSparX Premier ti ngaku penemu kreatif enggau besai empas ba raban nembiak.
Inisiatif nya nyata seriris enggau juluk perintah nengeri nempa rebak penyulur landik ti ulih nyungkak agenda ekonomi ngena penemu.
Konvensyen nya mega nerima sukung bakih strategik antarabansa nyengkaum Asia PGI enggau UKSEA Vax Hub, lalu nya negapka rentayan pengawa begulai global ba bidang sains enggau inovasyen.
Sama datai, Sapit Menteri MEITD, Datuk Francis Harden Hollis sereta bala bukai.-EDISI UKAS
