KUCHING: Palan Matau Penusah Nengeri Sarawak (SDCC) diatu disikap ngena kereban enggau teknologi moden agi dikena nambah penyikar pengawa matau sereta ngesah penusah ba selampur nengeri, lalu negap pengawa ngidupka nyawa enggau ngintu pengelantang rayat.

Sapit Premier Sarawak ti mega Chairman Komiti Penyangga Penusah Nengeri (JPBN) Sarawak, Datuk Amar Douglas Uggah Embas madah, palan nya disikap manah agi asil ari agih belanja diberi Agensi Penyangga Penusah Menua (NADMA) sepenyampau RM750,000.

Ku iya, pengawa nya mai ubah nyengala nyengkaum ngaduka skrin matau, komputer enggau sistem operasyen ti moden agi enggau efisien.

“Aku ngari ke Perintah Sarawak enggau JPBN meri terima kasih ngagai NADMA ke bantu tu.

“Kitai deka naka ulih bejalaika pangku pengawa nentuka semua pengawa penyangga penusah di Sarawak dipejalai enggau manah ungkup pengelantang rayat, tanggungpengawa kami nentuka nyawa likun,” ku iya.

Iya nibar ke jaku nya ba pengawa nyerah projek nyikap manah SDCC ditu, Hari Empat.

Ngenang silik, iya madah ke pemar besai ditapi raban penyangga penusah di Sarawak iya nya melaba endur enggau jam bah nuntung laban nengeri tu bisi mayuh endur ti tau ampuh sereta menua ti sedandang.

Ku iya, pekara nya ngasuh sida tusah deka nganjung tumu bala pegawai, kereban enggau aset ngagai endur ti betul, baka bah di Selangau taun 2023 lebuh bot ti disedia ukai ba endur penusah.

Berindik ari nya, iya ngarap ke Perintah Besai ulih mantu meri peragam betul agi enggau tumu berapa hari ngambi pengawa besikap ulih diatur manah agi.

Berebak enggau nya, iya madah ke perintah nengeri mega bekerejasama enggau institusyen pelajar tinggi ngena manah penemu sains enggau teknologi ba pengawa nambah penau mutar penusah baka dikemeran ba menua mansang.

Sama datai, Sapit Sekretari Perintah Sarawak (Administrasyen) Datu Felicia Tan Ya Hua sereta Tuai Direktor NADMA Meor Ismail Meor Akim.-EDISI UKAS

Pemberita: Nur Nabilla
Gambar: Ibanez Jeffery Guang