KOTA SAMARAHAN: Sarawak dipilih nyadi tuai rumah Konvensyen Antarabansa SHInE 2026: ‘Advancing Science, Health, Innovation and Engineering’ kena 9 nyentuk 11 September 2026 di Kuching ila deka nyadi penyungkak pemansang inovasyen pengerai enggau sains global.

Menteri Pelajar, Inovasyen enggau Pemansang Penau Sarawak, Dato Sri Roland Sagah Wee Inn madah, SHInE 2026 diatur mandangka Perintah Sarawak ransing ngemansangka ekosistem pansik tikas global ti ulih ngiga chara mutar praktikal ngagai pemar kemaya hari.

Ku iya, Sarawak ukai semina nyadi tuai rumah aja, tang bisi niat nyadi hab ti nyambung pansik, inovasyen enggau bejalaika polisi mungkur semua ungkup pemaik komuniti.

“Konvensyen tu nyadi penyungkak ngagai pengawa negap rentayan kerejasama antarabansa sereta ngerandang peluang baru ba pandik enggau pemansang besai empas,” ku iya ba aum media, ditu, Hari Empat.

Seraya Chairman Pengatur, Ts Dr Peter Morin Nissom nerang, SHInE 2026 nyagu visyen besai nempa ekosistem inovasyen dudi hari ari ngempuruka bala pakar ba mayuh disiplin penemu ba siti pelasar strategik.

Ngenang pekara sama, Tuai Pegawai Eksekutif Palan Penyakit Berampit Sarawak (SIDC), Profesor Madya Dr Ivan Yap Kok Seng madah, raban sida diatu bisi lebih 30 bakih kerejasama aktif nyengkaum rentayan antarabansa ti nyukung pemansang pansik vaksin, genomik enggau teknologi pengerai.

Iya mega madah, pengawa begulai strategik enggau bakih global baka UKSEA Vax Hub enggau Asia PGI mega nambah penau Sarawak ba pengawa pansik besai empas.

Entara lansa konvensyen nya ila nyengkaum lebih 300 penyereta ari menua tu enggau menua luar, lebih 30 pakar antarabansa deka bekunsi penemu, program pemansang penau nengah inisiatif BrightSparX sereta pemandang inovasyen lebih 30 organisasyen.

Kelimpah ari nya, konvensyen nya mega meri peluang nipak ke dagang, penemuai teknikal enggau ngelancharka produk pemadu baru ti bisi pengulih ngeranchak industri ngena teknologi enggau pengerai tumbuh.

SHInE 2026 diperati nyadi pengawa strategik dikena negap penuduk Sarawak nyadi hab pansik enggau inovasyen ba rantau tu, lalu meri asil ngagai pemansang ekonomi ngena penemu enggau nambah semekih nengeri ba tikas global.

Sama datai, Sapit Menteri Pelajar, Inovasyen enggau Pemansang Penau Sarawak Datuk Francis Harden Hollis. -EDISI UKAS