PETRONAS Youth Football Championship League 2025 Nempa Pemain Biak Sarawak
KUCHING: Inisiatif PETRONAS nyendia pelasar pemansang lumba ngagai nembiak Sarawak nengah Petronas Youth Football Championship League 2025 (PYFCL 2025) dipeda nyadi siti inisiatif besai reti ngansah penau sereta nempa pemereti rebak biak nengeri tu.
Sapit Menteri ba Opis Premier Sarawak (Pekara Korporat, Pemadah enggau UKAS), Datuk Abdullah Saidol madah, atur pekit nya ukai semina ngenang menang tauka alah, tang ngemerat kaul semua raban ba ekosistem pemansang lumba main bol.
Ku iya, sukung rat apai indai ti datai nedatka stadium nyata nunjukka tanggungpengawa besai institusyen ruang bilik nempa pemujur siku-siku atlit kelebih agi entara pemain biak beumur entara 14 nyentuk 16 taun.
“Ari pemujur siku raban lumba, bisi sukung meruan ari apai indai. Panjung enggau penatai sida malam tu nunjukka komitmen sereta semangat sereta gaga meda pemansang anak ba lumba,” ku iya ba Pengawa Nangguh enggau Nyua Perais Petronas Youth Football Championship League 2025 ti diatur di Stadium Sarawak, Petra Jaya kena Hari Enam.
Iya nyemetak madah, lumba bol ukai semina ngaul 22 pemain ba padang tang nyerangkung pangku pengawa besai individu ba luar padang nyengkaum jurulatih, referee, staf stadium, raban perubat sereta raban pengatur pekit.
Datuk Abdullah madah, disiplin, kerejasama beraban, nyaga emosyen sereta nitih ke gerah jurulatih ti dikemeran nengah lumba main bol patut dikena ba pengidup sehari-sehari pemain biak dikena nempa pemereti ati ti sebela enggau beretan.
Iya mega ngarap pengawa ngatur pekit baka nya ulih ditampung dudi hari sereta ditegap nengah pengawa ngemanah fasiliti lumba kelebih agi ba menua pesisir enggau menua ulu Sarawak ngambi mayuh agi rebak biak ulih mantaika penau ba renggat tinggi agi.
Nambah ke nya, Datuk Abdullah ngelalau apai indai anang putus pengatap meri peransang ngagai anak ngambi terus chakah ba lumba laban nya ulih nempa pemereti ati sereta nyeliah raban nembiak ari pengawa ti enda manah.
Ku iya, berengkah ari ngatur Petronas Youth Football Championship Tournament (PYFCT) nyentuk renggat final PYFCL 2025, bisi 819 pekit udah diatur ngaul 40,755 minit bemain sereta ngerikod 1,116 gol, seraya nyeremin pengulih besai pemain biak Saeaqak ngambi diangkat ngagai tikas tinggi agi.
Ba pengawa nya, kategori PSK16 ngemata KV Miri Landas Youth Team dipadu nyadi champion, dientudi My Team X SMKAI ba penuduk kedua seraya penuduk kedua bela dipenggi Kelab Pembangunan Bola Sepak SMK Sri Matang enggau Sarikei FA.
Trofi ungkup kategori tu udah disua Datuk Abdullah Saidol.
Ungkup kategori PSK14, Cascara Junior nyadi champion, Sekolah Sukan Negeri Sarawak (SSN) ba penuduk kedua seraya Mukah FA enggau Al Mateem Football Academy bekunsi penuduk ketiga.
Trofi kategori nya udah disua Direktor Opis Pelajar Nengeri Sarawak, Omar Mahli.
Anugerah individu mega bisi disua baka Fair Play PSK14 ngagai Kuching City Football Club Academy, penyipak gol pemadu mayuh PSK14 dipenggi Zainul Ariffin Mohd Zainuddin nengah semilan gol, penyaga gol pemadu mayuh enggi Aiman Ihtisyam Abrisam (Cascara Junior) enggau pemain pemadu manah diempu Vanderan Belikau (SSN Sarawak).
Ba kategori PSK16, anugerah Fair Play diempu NFDD Sarawak, penyipak gol pemadu mayuh diempu Mohd Aidil Ikhwan Mohamad nengah lima gol, penyaga gol pemadu manah diempu Bryan Nistelroy Joshua (KV Miri Landas Youth Team) enggau pemain pemadu manah Abdul Rafiq Rezwan Abdul Rahman ari KV Miri Landas Youth Team.
Pengawa nangguh nya ngemata pekit kepenudi entara My Team C SMKAI enggau KV Miri Landas Youth Team, ti ngemata KV Miri Landas Youth Team nurai pemujur nengah sipak penentu ba minit kepenudi.
Sama datai iya nya Chairman Komiti Besai Servis Perintah Nengeri Sarawak Datu Kameri Affandi, Menijar Besai Kanan Rentayan Raban Bekaul, Kaul Strategik enggau Komunikasyen Gerup PETRONAS Khairuddin M Jaafar, Sekretari Mendam Opis Menteri Nembiak, Lumba enggau Pemansang Pedagang Sarawak Morshidi Fredrick sereta temuai bukai. - EDISI UKAS
