Program PENDAYA-PERANTIS Nitih Konteks & Guna Pedagang Indu Dayak
KUCHING: Program PENDAYA ti deka diatur kena 12 enggau 13 Januari tu di Dayak Chamber Of Commerce & Industry (DCCI), nya siti ari chunto atur Program Pemungkal Tuai indu (PERANTIS) ti nitih konteks enggau guna indu ba Sarawak kelebih agi pedagang indu Dayak.
Menteri Pemansang Indu, Ruang Bilik enggau Komuniti, Dato Sri Nancy Shukri madah, woksyop nyadi tuai dua hari nya deka ngaul 50 pedagang indu Dayak nyengkaum penyereta baru enggau ti bepeneleba enggau berati ke pemansang pengelandik nyadi tuai, ngaga pemutus strategik, komunikasyen nemban sereta mentor enggau rentayan dagang.
Ku iya, indu Sarawak bisi pengulih besai nyadi tuai komuniti, penyungkak ekonomi lokal enggau penyaga pesaka budaya lebuh diberi peluang, latih sereta sukung ti meruan.
“Nengah peneleba, latih enggau sukung ti betul, indu Sarawak ulih ngesan pangku pengawa besai ba pemansang ekonomi, sosial enggau budaya sereta nunjukka penau enggau kreativiti sida ba panggau lokal tauka antarabansa.
"Program baka PENDAYA enggau PERANTIS ukai semina latih tang inisiatif nempa pengandal, ngetuai enggau penau indu mansang nipak ubah teknologi enggau ekonomi baru,” ku iya ba aum pemberita PENDAYA diatur Gerempung Rentayan Pemansang Indu enggau Pemeruan (WESNA) Kuching enggau DCCI, ditu kena Hari Enam.
Ngenang silik, Dato Sri Nancy madah, PERANTIS nya inisiatif opis menteri iya nengah Opis Pemansang Indu (JPW) dikena ngemansang tuai indu ba mayuh bidang.
“Naka 2025, program tu udah bejalaika 100 inisiatif ba selampur menua ngaul 4,770 penyereta indu ari mayuh penatai.
Berebak enggau nya, iya ngarap indu Sarawak ulih ngerebut peluang ke bisi diatu lalu nyadi tuai tauka pengemudi ekonomi digital berindik ari pemar besai ti ditapi ukai ketegal suntuk penau tang mega kurang peluang.
Sama datai ba aum pemberita iya nya Presiden DCCI Dato Allan Keripin Nangkai, Sapit Tuai Raban Indu Parti Pesaka Bumiputera Bersatu (PBB) Sarawak ti mega Kaban Kaunsil Indu Malaysia Dato' Angelina Celestine Ujang, Penyanding Penemu Khas DCCI Dato Sri Joseph Salang Gandum, Menijar DCCI ti mega Presiden WESNA Kuching Dr Carolina Sandra Giang, Penyanding Penemu Besai Raban Indu Sarawak (PPWS) Datu Dr. Rashidah Bolhassan enggau temuai dipebasa bukai. - EDISI UKAS
