MIRI: Pengerami Ngintu Hari Diri Sebilik enggau Taun Baru 2026 peranak Kampung Sungai Dua richah enggau penatai urung 350 peranak ba Lakeside Ilham Center kena 3 Januari.

Pengerami nya udah dipenyadi Kaban Parlimen Baram, Dato Anyi Ngau begulai enggau Kaban Kunsil Nengeri (ADUN) Telang Usan, Dato Dennis Ngau.

Sama datai iya nya Pegawai Pelilih Telang Usan, Ezra Uda sereta bala tuai komuniti lokal.

Lebuh bejaku, Dato Anyi meri terima kasih ngagai komiti pengatur ke pemujur ngatur program bepuguka diri sebilik enggau penyerakup nya.

Ku iya, program baka tu beguna amat dikena negap kaul sereta narak reti begulai enggau bebasa entara komuniti.

Nangkan nya, Dato Dennis nyemetak madah ke semangat penyerakup nyadi pugu besai nentuka pengelantang enggau pemansang komuniti lokal.

Ku iya, Hari Diri Sebilik ukai semina nyadi nalan belepa enggau begulai seraya nyadi pelasar negut kerejasama ungkup pemansang genturung pendiau.

Batang tuju ngatur pengerami nya dikena ngerapit kaul entara peranak Kampung Sungai Dua sereta negap semangat penyerakup komuniti nengah mayuh aktiviti ruang bilik ngaul serap umur.

Pengerichah program nya nyeremin semangat diri sebilik ti tegap entara peranak Kampung Sungai Dua. - EDISI UKAS