KUCHING: Sarawak dirintai entara lima palan pemadu manah endur pinchin, diumba penegap ekonomi nengeri sereta atur polisi bepuguka pengelantang rayat.
Kaban Kunsil Nengeri (ADUN) Batu Kitang, Datuk Lo Khere Chiang madah, Sarawak entara kandang menua ti ngerikod penatai pemisi pemadu tinggi ba Malaysia seraya nentuka mayuh inisiatif rayat dipejalai meruan.
Ku iya, entara pengelebih Sarawak iya nya tarif kuasa karan enggau ai ti baruh, chukai pintu ti patut sereta nyendia pelajar tinggi pechuma ngagai anak Sarawak.
“Suba, apai indai irau ke ungkus enggau peluang pelajar tinggi anak. Tang nengah iring Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg, perintah nengeri udah nyendia pelajar tinggi pechuma nentuka akses pelajar inklusif agi,” ku iya.
Iya madah munyi lebuh dirandau pengudah bejadi Pengerami Bejadi Program Latih Housekeepinganjuran Special Needs Society Kuching (SNSK) di Kuching, kena Hari Minggu.
Datuk Lo nyemetak madah, pelajar nya kunchi nempa pemansang menua enggau modal mensia.
Nambah ke nya, iya mega muji pangku pengawa gerempung ukai dikuasa perintah (NGO) nyengkaum Special Needs Society Kuching, ti terus komited nyaga pengelantang raban begunaka kereban khas sereta negap semangat begulai entara komuniti.
Ku iya, pemansang Sarawak ukai semina meri perati ngagai pemansang ekonomi tang mega ngemerat sukut penyiru enggau pengelantang sosial. - EDISI UKAS
