PADAWAN: Pemansang infrastruktur ti meruan terus nyungkak transfomasyen Kampung Braang Bayur ti diatu meri perati ngagai dagang temuai enggau ekonomi menua pesisir.

Sapit Menteri Pengangkut Sarawak (Langit enggau Darat) Datuk Dr Jerip Susil madah, Kampung Braang Bayur udah nengah ubah nyata kenyau ari lebih 10 taun ti udah, ukai semina ari sukut fasiliti fizikal tang mega nyeremin peneguh penyerakup enggau semangat begulai dalam komuniti.

Pekara tu nyata dipeda ba pun taun 2026 ngemata sekeda perengkaguna baka Begunan Sitak Genturung Pendiau (KRT), Balai Komuniti sereta Logo Kampung Braang Bayur ti nyadi elemen beguna nempa identiti genturung pendiau dipenyadi.

“Semua tu signifikan endar nyerumba sitak Mambong diaku nyadi sebagi ari Sarawak Delta Geopark (SDGP) UNESCO ti disadang tengan taun tu.

“Berindik ari nya, kelimpah ari pemansang infrastruktur, aku minta semua genturung pendiau ngemerat sukut pemeresi, semampai ngatur aktiviti beripai sereta nyendia logo enggau pintu penama ngambi sedia ngambat penatai temuai,” ku iya lebuh Pengerami Bejadi Infrastruktur Mensia Mayuh Kampung Braang Bayur, ditu kena Hari Lima.

Ba sukut pemansang ekonomi, Kaban Kunsil Nengeri (ADUN) Mambong mega mega nerang ke perambu projek ladang kupi beraban ba Kampung Bayur ngaul pemesai urung 20 ikar dipelaba beungkus RM21 juta ti disadang belabuh taun 2026.

“Projek tu nyerangkung numbuh palan ngumpul kupi, palan betanam, kafe kupi enggau palan pansik nengah sukung pemeranak puku antarabansa ari Belgium seraya bisi pengulih ngangkat kupi lokal nyadi produk mar rega ba renggat global,” ku iya.

Nambah ke nya, iya mega madah ke perambu pemansang Palan Komuniti Braang beungkus RM500,000, numbuh pasar komuniti, nyeruri rentayan jalai genturung pendiau sereta perambu timpuh panjai fasiliti pelajar enggau pengerai.

Kelai sukung ngagai atur genturung pendiau, iya mega ngemendar agih belanja sepenyampau RM30,000 ngagai Komiti Pemansang enggau Pengelikun Genturung Pendiau (JKKK) Braang Bayur sereta nyua Insentif Penyulut Akademik ngagai enam penerima kategori Sijil Pelajaran Malaysia (SPM) enggau Sijil Tinggi Persekolahan Malaysia (STPM) ari Kampung Braang Bayur.

Sama datai, Pegawai Penyerakup Bagi Menua Kuching Rose Jonathan Garau, Penulung Pegawai Tadbir ngari ke Pegawai Menguasa Opis Pelilih Mit Padawan Paul Mathiues Akin, Penghulu Sitak Braang Bengoh Tora Jonseng enggau Chairman KRT Kampung Braang Bayur Matthew Bateng. -EDISI UKAS