BAU: Peranak Kampung Tabong Singai diatu disikap jalai penyambung ti lantang enggau likun agi pengudah projek nyeruri Jalai Munyuong–Potik tembu lalu diserah ngambi ulih ditengah mensia mayuh.

Pengawa nyerah projek Jalai Kebun enggau Jalai Genturung Pendiau nya udah dipejalai kontraktor dichiri ngagai Kaum Kampung Tabong, Michael William, ba sebengkah pengawa ti diatur kena Hari Lima seraya ngelai projek nya ulih dikena ari peranak lokal.

Pengawa nyerah nya dikemata Sapit Menteri Pengangkut Sarawak (Sungai enggau Tasik) ti mega Kaban Kunsil Nengeri (ADUN) Tasik Biru, Datuk Henry Harry Jinep, kelai komitmen meruan perintah nengeri ngemanah infrastruktur pemun ba sitak menua pesisir.

Sama datai iya nya Penulung Injinir Pelilih Opis Kereja Raya (JKR) Bau, Wan Yusri, ti nyadi agensi pengatur projek sereta Pegawai Tadbir Agensi Penyeraris Pemansang Greater Kuching (GKCDA), Melissa Fiona Nelson.

Projek nengah GKCDA ungkup sitak DUN Tasik Biru nya beungkus RM397,000 lalu udah dipejalai ba taun 2025 bepun ari 18 Ogos 2025.

Projek nya tembu tumu ari taga asal ti ditetapka kena 17 Mei 2026.

Skop kereja nyerangkung ngaga enggau melakin baru jalai sepanjai 1.25 kilometer enggau pemesai 4.5 meter, nyengkaum ngaga struktur engkelebat pemesai 900 milimeter dikena ngemanah sistem parit sereta nambah pengetan jalai.

Pejalai projek tu disadang meri pemaik besai ngagai peranak Tabong Singai enggau ngemuntang pejalai, nambah pengelikun penguna jalai sereta nyukung aktiviti ekonomi enggau pengawa betanam betupi.

Projek nyeruri tu mega mandang inisiatif meruan Perintah Sarawak nentuka pemansang infrastruktur menua pesisir dipejalai berenggat dikena nyamin pengelantang enggau kualiti idup rayat. — EDISI UKAS