KUCHING: Bini Yang di-Pertua Negeri Sarawak Toh Puan Datuk Patinggi Fauziah Mohd Sanusi bisi datai ngerichah Pengerami Bubur Pedas Sarawak di Begunan Koperasi Raban Indu Sarawak Berhad (KOPERWANIS), Metrocity Matang, kena Hari Enam.

Pengerami Bubur Pedas taun tu ngatur mayuh aktiviti negap pesaka asal enggau dagang baka Pekit Ngaga Bumbu Bubur Pedas sereta Pekit Pemakai Kreatif Ngena Bumbu Bubur Pedas.

Datai ba endur program nya, Toh Puan Datuk Patinggi Fauziah begulai enggau Menteri Pemansang Indu, Nembiak Mit enggau Pengelantang Komuniti Sarawak Dato Sri Fatimah Abdullah bisi manduk bubur pedas kelai bejadi pengerami nya.

Nambah ke nya, lebuh dirandau pemberita, Chairperson KOPERWANIS Norjanah Razali madah, aktiviti tu ukai semina nyaga resipi asal tang mega ngerandang ruang inovasyen ba bidang gastronomi lokal ngambi bumbu bubur pedas ulih dikelaku enggau diangkat ngagai renggat ti tinggi agi.

Ku iya agi, Pekit Ngaga Bumbu Bubur Pedas tu udah dibuka ngagai semua lima Pampang Besai Raban Indu Sarawak (PPWS) selampur Sarawak.

“Kitai udah ngelala sapa ti menang entara penyereta ngaga bumbu tu lalu deka nyadi produk Sarawak.

"Bubur pedas tu pemakai asal kitai lalu meseti diangkat tang bumbu pedas nya empu produk Sarawak.

“Nya kebuah kitai endang keran ngaga bumbu nya lalu deka dikeluar ungkup KOPERWANIS," ku iya.

Ku iya agi, PPWS Pampang Sri Aman ari Maludan mujur bulih champion ba pekit nya.

Iya mega madah, bumbu tu deka nguji ngasilka produk sereta ngulihka setipikit halal sebedau dijual ba selampur Sarawak. -EDISI UKAS