GEDONG: Sekretari Perintah Sarawak, Datuk Amar Mohamad Abu Bakar Marzuki bisi ngabas raban tasah bah ba Palan Pengenduh (PPS) Balai Komuniti Gedong begulai enggau Kaban Parlimen Batang Sadong, Rodiyah Sapiee kena Hari Enam ngambi berati ke tikas penyikap sereta atur operasyen bantu ngagai raban tasah bah.
Ba pejalai ngabas nya, seduai mega bela ngabas raban tasah bah sereta meri terima kasih ngagai semua agensi pengelikun enggau penyelamat ti ngambi bagi ba operasyen mindah enggau ngatur PPS.
Ke rikod, bisi 21 raban tasah bah ari lima Tuai Bilik (KIR) diatu ba PPS nya naka pukul 11 pagi berindik ari penusah bah ti nuntung endur ngelingi nya.
Raban tasah bah tu ari siti ruang bilik ari Kampung Datuk Patinggi Muai, Gedong sereta empat ruang bilik ari Kampung Kanchong Baru (Sungai Girang), Gedong.
Ari penyampau raban tasah angus nya, tiga lelaki besai tuai, enam indu besai tuai, enam nembiak mit lelaki enggau lima nembiak mit indu nyengkaum siku anak indu baru ada udah dipindah ngagai PPS nya dikena nyamin pengelikun sereta pengelantang sida terus dijaga.
Sama datai iya nya Sapit Sekretari Perintah Sarawak (Administrasyen) Datu Felicia Tan Ya Hua, Sekretari Mendam Opis Menteri Pemansang Indu, Nembiak Mit enggau Pengelantang Komuniti Sarawak (KPWK) Nur Alina Abdullah @ Colliner Gohe, Sapit Direktor Unit Pengelikun enggau Penerit Adat Sarawak (UKPS) Abang Ahmad Abang Julai, Residen Bagi Menua Samarahan ti mega Chairman Komiti Penyangga Penusah Bagi Menua Samarahan Mohamad Irwan Bahari Bujang, Pegawai Pelilih Gedong ti mega Chairman Komiti Penyangga Penusah Pelilih Simunjan Tamida Da’adi enggau Tuai Polis Pelilih Simunjan DSP Rafhan Kepli. -EDISI UKAS
