KUCHING: Raban gawa Opis Menteri Dagang Antarabansa, Industri enggau Meranak Puku Sarawak (MINTRED) dipinta majak ngentapka budaya penyulut, integriti enggau profesionalisme ba tuju ngenegap agenda pemansang ekonomi nengeri.
Sapit Premier Sarawak ke mega Menteri Dagang Antarabansa, Industri enggau Meranak Puku, Datuk Amar Awang Tengah Ali Hasan madah, penyulut ukai semina ngaku tikas pemanah, tang mandangka pengeransing ba pengawa ngemanah, penyikar ngenatai servis atur perintah enggau integriti.
Ku iya, anugerah ke diberi ngelai penyulut tikas pemanah enggau tikas profesionalisme pegawai sereta staf opis menteri sepemanjai taun 2025.
“Aku meri tabi puji ngagai raban penerima anugerah lalu bela masa semua raban gawa nyengkaum sida ti nyadi kedap penyulut opis menteri,” ku iya.
Iya madah munyi nya ba Pengerami Anugerah Servis Nyulut (APC) MINTRED 2025 berambaika jaku “Honouring Excellence, Celebrating Legacy, Embracing the Future” ditu, Hari Satu.
Kelimpah ari nya, iya meri terima kasih ngagai ex Sekretari Mendam MINTRED, Dzulkornain Masron ke iring tuai iya sereta jasa iya sekumbang gawa ba opis menteri nya, kelimpah madah Datu Lester Matthew dichiri nyadi Sekretari Mendam MINTRED ke baru.
Bekaul tikas ekonomi nengeri, Datuk Amar Awang Tengah madah, Sarawak terus ngerikod pengetan ekonomi ti tegap nengah polisi ti engkeman enggau juluk ati pemansang timpuh panjai ti nyengala.
Kenyau 2021 nyentuk suku ketiga 2025, ku iya nerang, Sarawak mujur matak pengawa meranak puku manggai RM105.9 bilion, lalu mandangka pengandal pemeranak puku ngagai nengeri tu nyadi palan alai meranak puku ke tau dipilih.
Sama datai maya nya, Sapit Menteri MINTRED Datuk Dr. Malcom Mussen Lamoh, Penyanding Penemu PKS MINTRED Dato Sri Mohd Naroden Majais, Tuai Pegawai Eksekutif Invest Sarawak Timothy Ong, Tuai Pegawai Eksekutif, Opis Dagang enggau Dagang Temuai Sarawak di Brunei Darussalam (STATOB) Samat Junai enggau pengari Tuai Pegawai Eksekutif Opis Dagang enggau Dagang Temuai Sarawak di Singapura (STATOS) Kenny Lau.-EDISI UKAS
