SERIAN: Perintah Sarawak nimbal manah langgur ngatur baru peresa Ujian Pencapaian Sekolah Rendah (UPSR) enggau Pentaksiran Tingkatan Tiga (PT3).

Menteri Pelajar, Inovasyen enggau Pemansang Penau Sarawak ti mega Kaban Kunsil Nengeri (ADUN) Tarat Dato Sri Roland Sagah Wee Inn madah, iya empu ngarap sistem peresa nya ulih digaga baru laban nya besai reti nyadi lalau tikas pemanah nembiak.

“Aku ngarap peresa nya bisi baru. Sigi patut baka nya. Nya kebuah kitai ngatur Ujian Penilaian Program Dwibahasa Sarawak (UPDLP).

“Taun dulu, UPDLP ungkup nembiak Primari Enam lalu dalam kandang timpuh tiga taun deka datai, raban nya ba Pom Tiga. Nya bepanggai enggau maya hari tu lalu deka dikemanah maya tu enggau nangkan nya," ku iya.

Iya madah munyi nya maya dirandau media ba Pengawa Ngabas Hari Keterubah Sekula ba Sekula Sekondari (SMK) Tun Abdul Razak ditu, Hari Satu.

Ditanya baikka UPDLP deka dipajak enti sema UPSR enggau PT3 bisi baru, iya madah, perintah nengeri deka nisih enti polisi nya udah diputus ba renggat Perintah Besai.

“Kitai deka meda enti udah diputus. Tang patut dikeingat UPDLP ngena Jaku Inggeris,” ku iya nerang.-EDISI UKAS