SRI AMAN: Sebana bekaul pengenyai ke nyadi ba Jematan Sebujok di menua Ulu Undop ditu diputar Sapit Menteri Pelajar, Inovasyen enggau Pemansang Penau, Datuk Francis Harden Hollis.
Iya ke mega Kaban Kunsil Nengeri (ADUN) Simanggang udah ngemendarka agih belanja sepenyampau RM500,000 dikena ngaga pengawa nyeleti jematan nya.
"Tuai Rumah Suntie Sayup ari Sebujok, Ulu Undop udah ngenataika sebana ngagai kami bekaul bisi merekah ba pun jematan nya lalu minta diadu jampat.
"Nya kebuah, aku udah ngemendar projek Program Transformasyen Menua Pesisir (RTP) DUN Simanggang dikena ngaga pengawa nyeleti jematan nya," ku iya maya dirandau lebuh ngabas pengawa nyeleti jematan nya, apin lama ti udah.
Nambah ke jaku iya, Datuk Francis madah, pekara nya besai reti ungkup pengelikun bala mayuh ke suah ngena jematan nya lebih agi nembiak enggau orang ke bekebun.
Kelimpah ari nya, tiga iti parit ba sepemanjai jalai Kampung Sungai Reboh nyentuk ngagai Kampung Paku Ili semak Batu Lintang, Undop bela udah digaga, ditu.
"Enggau tu, penanggul bah ulih diseliah kelimpah nyendiaka jalai ke likun agi alai perengka pengangkut mit,” ku iya.
Nambah ke jaku iya, iya madah, pengawa ngabas taba projek RTP tu mandangka pengeransing perintah nentuka pengawa pemansang infrastruktur ba menua pesisir dikemerat ungkup pengelantang rayat DUN Simanggang. -EDISI UKAS
