ABU DHABI: Sarawak terus ngentapka penuduk ba sektor kuasa baru di panggau global nengah penatai Sapit Menteri Kuasa enggau Pemeruan Rampa Menua Sarawak, Datuk Dr Hazland Abang Hipni ngulu deligit Sarawak ke Abu Dhabi Sustainable Week (ADSW) 2026 di Abu Dhabi, Emiriah Arab Bersatu (UAE) ari 13 ngagai 15 Januari tu.

Kaul Sarawak ba program betikas besai nya mandangka tanggungpengawa sereta inisiatif nengeri tu ngenegap agenda kuasa enggau pemeruan rampa menua.

Program bejadi ADSW 2026 ti diatur kena 13 Januari 2026 ba Abu Dhabi National Exhibition Centre (ADNEC) nya udah dipenyadi Presiden UAE, Sheikh Mohamed Zayed Al Nahyan.

Program tu nyadi sebagi ari pelasar global ninting taun ti ngempuru tuai dunya, penengkebang polisi, pemekuh industri sereta raban bepengelandik dikena nyungkak pemansang meruan ba renggat antarabansa.

Maya bejadi program nya, Sheikh Mohamed Zayed madahka tanggungpengawa ADSW ke nyadi pelasar global ti nyengulai perintah, dagang enggau pemeranak puku, kelimpah ngemerat pemesai reti teknologi mansang sereta Artificial Intelligence (AI) dikena nambah penyikar, pengetan sereta pemansang ekonomi.

Berambaika jaku “The Nexus of Next: All Systems Go”, ADSW 2026 ngempuru ‘stakeholder’ macham sektor lalu berati sistem kuasa ti disungkak AI, pengawa melanja klimet sereta inovasyen dikena ngenegap pengetan, pengelikun pemakai enggau ai nengah kerejasama ngilah sektor.

Serak tu, Datuk Dr Hazland disadang nyadi panelis ungkup program Komiti Nasional Tuju Pemansang Meruan (SDGs) berambaika jaku “Resilient Systems, Real Results” kena 15 Januari tu ti mandangka pemujur sereta chara Sarawak ba sektor kuasa enggau rampa menua.

Bisi sekeda agensi ari Sarawak bela nyadi penyereta ADSW 2026 baka Senari Synergy Sdn Bhd, Bintulu Port Holdings Berhad, Sarawak Energy, Institut Kelestarian dan Tenaga Boleh Baharu (ISuRE) Universiti Malaysia Sarawak (UNIMAS) enggau Sarawak Metro Sdn Bhd.

Batang program ke diatur MASDAR tu digulu lebih 50,000 penyereta berejista ari 150 menua ti mandangka teknologi sereta pengawa mutar betikas besai nyerangkung kuasa solar enggau ulih dikena baru, hidrogen enggau kereban api beresi, teknologi ai enggau atur teda, ekonomi idar, mengeri pintar, e-mobiliti, pekara wang gadung, kuasa digital, Artificial Intelligence (AI) enggau pengelikun siber.-EDISI UKAS