BINTULU: Pengawa besikap tumu kenyau ari September taun dulu ngulihka Perintah Sarawak ngatur sereta mutar bah enggau mujur agi, taja napi gaya hari ti enda tentu.

Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, taja melaba gaya hari mantu ari sukut jam, palan ke kena ujan agi pedis disangka, nya alai pengawa besikap tumu dikemerat ba pengawa napi penusah ngenyit.

Ku iya, maya ngabas sekeda Palan Pengenduh (PPS) nyengkaum di Sebauh beratika bantu ke diberi chukup sereta berurun, kelimpah orang tasah tepantup ati enggau perengka guna sereta alai ngenduh ke disedia.

"Ba pekara ngintu pengelantang enggau pengerai orang tasah bela dikemerat.

"Orang tasah ke bisi enda bepengerai baka sengak enggau strok, kes tu udah diputar enggau kerejasama tim perubat sereta Opis Pengintu Pengelantang," ku iya.

Iya madah munyi nya maya aum media serimbai pengawa ngabas Palan Pengenduh (PPS) orang tasah bah ba Dewan Suarah Bintulu, Hari Tiga.

Iya bela madahka gaya bah majak manah alai bisi 56 ari 66 PPS udah ditutup, lalu 10 PPS agi dibuka lalu penyampau orang tasah nurun ngagai 1,638 iku.

Sama datai, Sapit Premier Sarawak ti mega Chairman Komiti Pengatur Penusah Ngenyit Nengeri Sarawak Datuk Amar Douglas Uggah Embas, Menteri Industri Pemakai, Komoditi enggau Pemansang Kandang Menua Sarawak ke mega Kaban Kunsil Nengeri (ADUN) Kemena Dato Sri Dr Stephen Rundi Utom, Menteri Pemansang Indu, Nembiak Mit enggau Pengelantang Komuniti Sarawak Dato Sri Fatimah Abdullah, Sekretari Perintah Sarawak Datuk Amar Mohamad Abu Bakar Marzuki, Sapit Menteri Infrastruktur enggau Pemansang Penyangkai Kapal Sarawak ti mega ADUN Samalaju Datuk Majang Renggi, ADUN Jepak Iskandar Turkee, Sapit Sekretari Perintah Sarawak (Administrasyen) Datu Felicia Tan Ya Hua, Residen Bagi Menua Bintulu Datu Nyurak Keti, Direktor Unit Pengelikun enggau Penerit Adat Sarawak Abdul Wahab Rahim enggau Pegawai Pelilih Bintulu Awang Mohammed Nizam Awang Ali Bohan.-EDISI UKAS