Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, pengawa nyeleti jalai alun ke jai laban bah enda diadu tekala nya laban irau enggai ke bah tau nyadi baru.
“Kitai melaba nyangka agi tau bah nyentuk Februari. Enti diadu diatu, nyangka tau jai baru.
“Nya alai, pengawa ngadu baru deka digaga sepengudah musin landas," ku iya ba aum media serimbai pengawa ngabas Palan Pengenduh (PPS) ba Dewan Suarah Bintulu, Hari Tiga.
Nitih ku Datuk Patinggi Abang Zohari, perintah nengeri deka nisih isu sungai sereta sistem parit, lebih agi ba kandang mengeri Bintulu ti deras mansang, nengah randau enggau perambu komprehensif ba renggat nengeri sereta raban bekaul baka Opis Pemansang Bintulu (BDA).
Iya mega madah, pengawa berumah patut seriris enggau pelin dikena nyeliah penanggul parit enggau arus ai ti tau ngasuh bah.
“Kitai deka bekerejasama enggau opis bekuasa menua (PBT) enggau kompeni ngaga rumah ngambi ngadu baru sistem parit enggau manah agi," ku iya.
Sama datai, Sapit Premier Sarawak ke mega Chairman Komiti Pengatur Penusah Ngenyit Nengeri Sarawak Datuk Amar Douglas Uggah Embas, Menteri Industri Pemakai, Komoditi enggau Pemansang Kandang Menua Sarawak ti mega Kaban Kunsil Nengeri (ADUN) Kemena Dato Sri Dr Stephen Rundi Utom, Menteri Pemansang Indu, Nembiak Mit enggau Pengelantang Komuniti Sarawak Dato Sri Fatimah Abdullah, Sekretari Perintah Sarawak Datuk Amar Mohamad Abu Bakar Marzuki, Sapit Menteri Infrastruktur enggau Pemansang Penyangkai Kapal Sarawak ti mega ADUN Samalaju Datuk Majang Renggi, ADUN Jepak Iskandar Turkee, Sapit Sekretari Perintah Sarawak (Administrasyen) Datu Felicia Tan Ya Hua, Residen Bagi Menua Bintulu Datu Nyurak Keti, Direktor Unit Pengelikun enggau Penerit Adat Sarawak Abdul Wahab Rahim enggau Pegawai Pelilih Bintulu Awang Mohammed Nizam Awang Ali Bohan.-EDISI UKAS
