BINTULU: Sapit Premier Sarawak Datuk Amar Douglas Uggah Embas ningkah penemu orang tasah bah ti enggai mindah ngagai Palan Pengenduh (PPS) nadai nerima bantu belanja.

Iya ke mega Chairman Komiti Pengatur Penusah Ngenyit Nengeri Sarawak (JPBNS) madah, nadai penerang baka nya kala digaga lalu pekara besai ti dikemerat perintah nengeri iya nya mindah ke orang tasah bah ngambi nyamin pengelikun sida.

“Aku nadai kala madah orang tasah ke enggai bepindah enda bulih bantu.

"Utai ke dikemeratka aku iya nya sida ti patut pindah meseti pindah dikena nentu pengelikun sida," ku iya madah ngagai pemberita maya pengawa ngabas Palan Pengenduh (PPS) orang tasah bah ba Dewan Suarah Bintulu, Hari Tiga.

Sama datai, Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg.

Nitih ku iya, gaya bah ba sekeda kandang menua, nyengkaum di Sebauh, ngirauka ati lebuh bisi rumah panjai tama ai nyentuk datai ba perabung, nya ngasuh pengawa mindah patut dikira.

“Enti baka nya, peranak menua enda tau terus diau ba rumah.

“Baka ke nyadi ba Kuching, taja bisi orang tasah enggai bepindah, sida meruan dipinta mindah ketegal ngira pengelikun sida," ku iya.

Bekaul isu meri bantu ngagai orang tasah ke milih enda bepindah laban nyaga rumah enggau reta, iya madah pekara nya agi ulih dirunding nitih sekeda atur.

Ku iya, nitih gaya, semina dua tauka tiga iku aja dikemendar ba rumah panjai ketegal matau, lalu dikira Chairman Komiti Pengatur Penusah Ngenyit ba renggat bagi menua.

Nambah ke jaku iya, iya madah, raban polis mega udah dipinta matau rat rumah panjai ke ditinggal ngambi nadai pekara ti enda manah nyadi.

Ku iya, sebarang pemutus bekaul pengawa mindah enggau meri bantu deka digaga bepelasarka gaya ke bendar ba menua lalu ngira pekara pengelikun enggau pengelantang orang tasah bah.

Sama datai, Menteri Industri Pemakai, Komoditi enggau Pemansang Kandang Menua Sarawak ti mega Kaban Kunsil Nengeri (ADUN) Kemena Dato Sri Dr Stephen Rundi Utom, Menteri Pemansang Indu, Nembiak Mit enggau Pengelantang Komuniti Sarawak Dato Sri Fatimah Abdullah, Sekretari Perintah Sarawak Datuk Amar Mohamad Abu Bakar Marzuki, Sapit Menteri Infrastruktur enggau Pemansang Penyangkai Kapal Sarawak ti mega ADUN Samalaju Datuk Majang Renggi, ADUN Jepak Iskandar Turkee, Sapit Sekretari Perintah Sarawak (Administrasyen) Datu Felicia Tan Ya Hua, Residen Bagi Menua Bintulu Datu Nyurak Keti, Direktor Unit Pengelikun enggau Penerit Adat Sarawak Abdul Wahab Rahim enggau Pegawai Pelilih Bintulu Awang Mohammed Nizam Awang Ali Bohan.-EDISI UKAS