KUCHING: Pengawa nisih baru Opis Menteri Industri Pemakai, Komoditi enggau Pemansang Kandang Menua Sarawak (M-FICORD) dipeda siti inisiatif strategik dikena nambah pemujur pejalai polisi, ngemanah atur perintah sereta nentuka tuju ti nyengala ba batang pengawa opis menteri nya.
Menteri ba opis menteri nya, Dato Sri Dr Stephen Rundi Utom madah, M-FICORD siti ari opis menteri ti ngesan skop tanggungpengawa ke besai enggau macham portfolio ba baruh siti atur.
Nitih ku iya, opis menteri nya kenyau ari suba nyerangkung bidang betanam betupi, pemansang tanah enggau pemansang menua pesisir lalu nempa iya nyadi siti entiti ti kompleks ari pekara perambu enggau pejalai pengawa.
"Tang ungkup taun tauka penggal deka datai, nyangka kitai patut nisih baru, ngambi berati agi ba pengawa opis menteri.
“Kitai mega deka bisi menteri bukai, enda lebih ari empat iku, ngambi tanggungpengawa ulih dikunsi tang servis perintah agi meruan sama,” ku iya.
Iya madah munyi nya maya bejaku ba Pengerami Makai Lemai Industri Asas Tani Gemilang 2026 ditu, Hari Tiga.
Dato Sri Dr Stephen Rundi bela ngelanggur numbuh siti unit ba baruh opis menteri iya dikena ngatur buah ke bemusin lebih agi dikena ngangkat produk ili ti ngasilka produk bepelasarka buah nya.
Ku iya nerang, tu ketegal penyiru ati iya ngagai raban bekebun ti udah diperansang perintah ngambi ngasilka buah bemusin tang atur buah bemusin agi bedau dipejalai enggau chara ti sistematik.
"Nyadi chara iya, kitai patut ngangkat produk ili ke alai kitai patut nengkebang produk sereta ulih dijual.
"Ambi ke banding, rian ulih digaga nyadi pes, ais krim tauka ke bukai nyengkaum dabai mega tau digaga nyadi macham produk," ku iya madah baru.
Sama datai, Sekretari Mendam M-FICORD Datu Sirai Daha, Sapit Direktor Opis Betanam Betupi Sarawak Gilbert Igi sereta raban kereja Opis Betanam Betupi Sarawak. -EDISI UKAS
Pemberita: Ahmad Daniel Faiz
Gambar: Ahmad Daniel Faiz
